राष्ट्रियसभा दुजःपिंसं थौंया बैठकय् समसामयिक विषयय् सरकारया ध्यानाकर्षण यानादीगु दु। लिसें वय्कःपिंसं अछामया ढकारी गाउँपालिकाय् छुं न्हि न्ह्यः निम्ह मनू सीनाच्वंगु लूगु घटनाया अनुसन्धान यायेत सरकारया ध्यानाकर्षण यानादीगु दु। सभाया थौंया बैठकया शून्य इलय् वय्कःपिंसं घटनाय् ल्हाःदुपिंत कारबाही यायेत माग यानादिल।

सांसद गङ्गाकुमारी बेल्बासें अछामया ढकारी गाउँपालिकाय् सरस्वती खड्का व ईश्वरी खड्कायात स्यापिंत कडा कानुनी कारबाही यायेत व आः वइगु न्हिसं थजाःगु घटना जुइके मबीत सरकारयात ध्यानाकर्षण यानादिल। सांसद शारदादेवी भट्टं मनू स्याःपिंत कडासिबें कडा कारबाही यायेत सरकारया ध्यानाकर्षण यानादिल। वय्कलं मिसा हिंसाया घटना म्ह्वः जुइ मपूmगु व न्हिया न्हिथं मिसा हिंसाया घटना तच्वनाःवंगु दुःखया खँ खः धयादिल।

सांसद गोपीबहादुर सार्की अछामीं सिन्धुपाल्चोकया भोटेकोशी गाउँपालिकाया मतिनामि २२ दँया दिनेश विकयात नापलाः वंबले गामय् च्वंपिंसं दांयाः स्याःगु घटनाया छानबिन यानाः दोषीयात कारबाही यायेत माग यानादिल। सभाया मेम्ह दुजः जगप्रसाद शर्मां स्वच्छ लः त्वनेगु नागरिकया नैसर्गिक हक छ्यलाबुलाय् हयेत व खानेपानी वितरण प्रक्रियाय् वनाच्वंगु मतया महसुल मिनाहा यायेत सरकारया ध्यानाकर्षण यानादिल।

सांसद तारामान स्वाँर, मायाप्रसाद शर्मा व तुलसाकुमारी दाहालं सुदूरपश्चिम प्रदेशया राजधानी निर्माणया निंतिं संघीय सरकारं ध्यान बिइमाःगु, जाजरकोटयठ् भुखाचं प्रभाविततय् आवास पुनःनिर्माणय् लिबाके मज्यूगु व संविधानया भावनाकथं कानुन निर्माण यायेत संघीय संसद्या आःया अधिवेशन केन्द्रित जुइमाःगु खँय् बः बियादिल।

Categorized in राष्ट्रिय