मध्यपुरथिमि नगरपालिका–७ नगदेशय् झीनिदँ लिपा आइतबाः सनिलय् न्ह्याःगु ऐतिहासिक पुलुकिसी जात्रा न्ह्याःगु दु।

दँय् दसं भिंद्वादशीया न्हि न्यायेकिगु स्वस्थानी व्रत बाखनय् लिधना च्वंगु पुलुकिसी जात्रा आर्थिक अभावलिसें थी थी हुनिं दिनाच्वंगुलिइ स्थानीयया न्ह्यपलाखय् झीनिदँ लिपा थुगुसिइ न्ह्याःगु स्थानीय विनोद कोजूं धयादिल।

जात्रा नगदेशया लाछित्वाःया सिद्धिगणेद्यःया देगलं न्ह्यानाः वाननी, छ्वासः, ध्वाकसि, त्वागा, न्यागाचा लिसेंया त्वालय् चाःहिका न्यायेकूगु खः। श्री स्वस्थानी व्रत बाखँ कथं किसीं राजकुमार कथं ब्राह्मणया काय् नवराजयात ल्यःगु बाखँयात थुगु पुलुकिसी जात्रां म्वाकाः तःगु खः धकाः वय्कलं धयादिल।

थुगुसिइ समितिं स्थानीय एलिस बाडेयात राजकुमारया कथं न्ह्यब्वया पुलुकिसीइ गयेकाः त्वाःत्वालय् चाहिकाः जात्रा न्यायेकूगु खः। राजकुमार जुम्हेस्यां फुक्कसितं भ्वय् नकेमाःगु परम्परा दूगु व भ्वय् नकेबलेया खर्च अप्वःगुलिं जात्रा दिनाच्वंगु स्थानीय तय्सं धाःगु दु। थुगुसिइ समितिया सहलह कथं एलिसयात राजकुमारया कथं न्ह्यब्वःगु खः।

जात्रा न्ह्याये न्ह्यः आइतबाः सनिलय् नगदेशया लाय्कुलिइ च्वंगु सिद्धि गणेद्यःया देगः ख्यलय् स्थानीयतय्त भ्वय् नकाः पुलुकिसी जात्रा न्ह्याकूगु खः।थुगु जात्रा न्यायेकेगु झ्वलय् थः ल्वम्ह मतिनामि नाप जीवन हने दयेमाः धकाः मनंतुनां ल्याय्म्हतय्सं अपसं च्वनेगु नं परम्परा दु।

नगदेश लाय्कु दरबार समितिया दुजः भाइजन बाडें येँ व ख्वपय् येँयाः बलय् पुलुकिसी जात्रा यानाच्वंसां नगदेशय् धाःसा स्वस्थानी बाखँया लिधंसाय् थ्व जात्रा न्यायेकेगु यानाच्वंगु दु धकाः धयादीगु दु ।(रासस)

Categorized in राष्ट्रिय