उद्योग, वाणिज्य नापं आपूर्ति मन्त्री दामोदर भण्डारीं सरकार सुचं प्रविधिया ख्यःयात लगानीया प्रमुख गन्तव्य कथं विकास यायेगु जूगु धयादीगु दु।

नेपाल कम्युनिष्ट पार्टी (एमाले) विज्ञान नापं प्रविधि विभागं थौं थन ग्वसाः ग्वःगु ‘नेपाःया निंतिं सुचं प्रविधिइ आधारित उद्यमशीलता ः आर्थिक समृद्धिया न्हूगु लँपु’ बिषयया अन्तरक्रियाय् वय्कलं सरकार सुचं प्रविधिया माध्यमं मुलुकय् सुशासन दयेकातयेगु विषयकय् न्ह्याःगु धयादिल।

सन् २०२६ य् तक नेपाल विकासशील देय्या धलखं स्तरोन्नति जुइगु न्ह्यथनादिसें वय्कलं उकिया निंतिं नं सुचं प्रविधिइ लगानी अप्वयेकेत आवश्यक जूगु धयादिल। वय्कलं कम्पनी स्थापना नं अटोमेसन (स्वचालित)या माध्यमं सञ्चालन यायेगु कथं प्रक्रिया न्ह्याकूगु धयादिल।

“थौं छेँय् च्वनाः कम्पनी दर्ता यायेगु ज्या न्ह्याकेधुंकागु दु। ज्याकुथि दर्ता जुइसातकिं हे उद्योग नं स्वतः दर्ता यायेफइगु व्यवस्था यानागु दु”, वय्कलं धयादिल। उद्योगमन्त्री भण्डारीं सरकारं सेवा प्रवाहया ख्यलय् सुशासनया अनूभूति बियाच्वंगु धयादिल। वय्कलं धू, प्रदुषण उत्सर्जन याइगु उद्योगतय्त सुचं प्रविधिया छ्यलाबुला याकेमाःगुलिइ बः बियादिल। वय्कलं पुँजी व प्रविधियात विशेष महत्व जुइकथं न्ह्यथंगु धयादिसें प्रविधियात नालाः काये मफुत धाःसा थौंया विकास सम्भव जुइमखु धकाः धयादिल।

मन्त्री भण्डारीं आःया उद्योग व उद्यमशीलतायात सुचं प्रविधिया माध्यमं न्ह्यःने यंकेगु निंतिं नीति हयेत तकं तयारी जुयाच्वंगु धयादिल। वय्कलं मन्त्रालयअन्तर्गतया कानूनयात सुधार यानाः लगानी, प्रविधि व उद्योग स्थापना यायेत बः ब्यूगु धापू तयादिल । वय्कलं करय् सहुलियत बिइफःसा सुचं प्रविधिया विकास अझ अप्वइगु नं धयादिल।

कम्प्युटर एसोसिएसन अफ नेपाल (क्यान)या नायः सुनैना पाण्डें सुचं प्रविधिलिसे सम्बन्धित कानूनय् खनेदूगु समस्यायात सरकारं सहजीकरण यायेमाःगु धयादिल।

Categorized in राष्ट्रिय