परराष्ट्रमन्त्री डा आरजु राणा देउवा ओमानया विदेशमन्त्री सायद बद्र बिन हमाद बिन हमूद अल बुसैदीया ब्वनाय् ओमान भ्रमणया निंतिं झायादीगु दु।

छवाः तक जुइगु भ्रमणया निंतिं प्यम्ह दुजःया नेपाःया प्रतिनिधिमण्डलया नेतृत्व यानादिसें वय्कः थौं सुथय् अन झायादीगु मन्त्रालयं धाःगु खः। भ्रमणया झ्वलय् मन्त्री डा राणां ‘समुद्री साझेदारीया न्हूगु क्षितिजपाखेया यात्रा’ धइगु नारा ज्वनाः ओमानया राजधानी मस्कटय् ग्वसाः ग्वयेत्यंगु ‘च्याक्वःगु हिन्द महासागर सम्मेलन’य् ब्वति कयादी।

भ्रमणया झ्वलय् मन्त्री डा राणां ‘विश्वया दक्षिणी भेगया सः थकायेगु’ शीर्षकय् सम्मेलनया पूवंगु सत्रयात संबोधन याइगु मन्त्रालयया प्रवक्ता कृष्णप्रसाद ढकालं धयादिल। नापं वय्कलं ओमानया विदेशमन्त्री, ऊर्जा नापं खनिजमन्त्री व ओमानया मेमेपिं सम्बन्धित मन्त्रीतलिसे नापलायेगु ज्याझ्वः नं दु।

थुकिया अतिरिक्त थवंथः ग्वाहालिया ख्यलय् छुंछुं समझदारी पौलय् ल्हाःचिं तयेगु ज्याझ्वः नं दु। परराष्ट्र मन्त्री डा राणां खाडी ग्वाहालि परिषद् (जिसिसी) देसय् दुपिं नेपाःया राजदूत व नियोग प्रमुखतलिसे भर्चुअल मुँज्या नं यानादी। थ्वलिसें मस्कटय् च्वनाच्वंपिं नेपाःया समुदायतय्त संबोधन याइगु ज्याझ्वः दूगु नं मन्त्रालयं धाःगु दु।

Categorized in राष्ट्रिय