राष्ट्रपति रामचन्द्र पौडेलं कीपुलिइ च्वंगु बर्न अस्पतालय् वासः याकाच्वनादीम्ह उपप्रधानमन्त्री लिसें अर्थमन्त्री विष्णु पौडेलया स्वास्थ्य अवस्थाया जानकारी कयादीगु दु।

राष्ट्रपतिं मन्त्री पौडेल व पोखरा महानगरपालिकाया प्रमुख धनराज आचार्यया स्वास्थ्य अवस्थाबारे जानकारी कयादीगु खः। वय्कःपिं निम्हं शनिबाः पर्यटन प्रवद्र्धन सम्बन्धी पोखराय् ग्वसाः ग्वःगु छगू ज्याझ्वलय् बेलुन ब्वयेकेगु झ्वलय् घाःपाः जुयादीगु खः।

वय्कःपिं निम्हेसिया नं सघन उपचार कक्षय् तयाः उपचार जुयाच्वंगु दु। राष्ट्रपति पौडेलयात स्वास्थ्यमन्त्री प्रदीप पौडेल, स्वास्थ्य सचिव डा रोशन पोखरेल व अस्पतालया निर्देशक डा किरणकिशोर नकर्मीलिसें वय्कःपिनिगु उपचार याना वयाच्वंपिं चिकित्सकतय्सं स्वास्थ्य अवस्थाबारे जानकारी बियादीगु खः।

डा नकर्मीं मन्त्री पौडेल व महानगर प्रमुख आचार्यया अवस्था सामान्य जुजुं वंसां छुं ई चिकित्सक तय्गु निगरानीइ तयेमाःगु खँ धयादिल। अस्पतालयात जलनया उपचारया निंतिं अत्याधुनिक उपकरण व प्रविधिलिसेंया व्यवस्था यायेमाःगु खँ नं वय्कलं कुलादिल।

Categorized in राष्ट्रिय