प्रदर्शनी पर्यटन राजधानी पोखराय् न्हापांखुसी स्वंगू देशीय पर्यटन प्रदर्शनी नाइस–२०२५ (नेपाल–इण्डिया चाइना–प्रदर्शनी) थनिंनिसें न्ह्याःगु दु।

जःलाखःला देय् भारत व चीनपाखें अप्वः स्वयां अप्वः विदेशी पर्यटक दुत हयेगु आज्जु तयाः प्रदर्शनी न्ह्याकेत्यंगु खः। स्वन्हु तक न्ह्याइगु प्रदर्शनीइ पर्यटन ख्यःया ८० म्ह क्रेता, ७० म्ह बिक्रेता व ७५ म्ह अन्तरराष्ट्रिय प्रतिनिधिलिसें खुसः स्वयां अप्वसिनं ब्वति काःगु दु।

प्यासिफिक एशिया ट्राभल एशोसिएसन (पाटा) नेपाल च्याप्टरं नेपाल पर्यटन बोर्ड, पोखरा पर्यटन परिषद् व मेमेगु सरकारी नापं निजी ख्यःया साझेदार स्वापूदुपिलिसेया मंकाःज्याय् प्रदर्शनी ग्वसाः ग्वयागु धाःगु दु। ‘नाइस फर माइस एण्ड मोर’ धइगु नारा ज्वनाः ग्वसाःग्वःगु प्रदर्शनीं पोखरायात पदयात्रा व साहसिक पर्यटन केन्द्रया कथंजक मखु माइस पर्यटन (अथे धइगु बैठक, सभा सम्मेलन, हःपाः, इहिपा नापं मेमेगु उत्सव, महोत्सव, समारोह, मेला व प्रदर्शनी यायेगु आकर्षक गन्तव्य कथं प्रवद्र्धन यायेगु पाटा नेपालं धाःगु दु।

प्रदर्शनीया निन्हुकुन्हु फागुन १३ गते द नलेज फोरमं ‘भिसा डेस्टिनेसन इनसाइट्स ः सपोर्टिङ द टुरिजम इकोसिस्टम टु सस्टेनेबल हस्पिटालिटी फ्रम कन्स्ट्रक्सन टु अपरेसन’लिसेंया विषयकय् पर्यटन विशेषज्ञतय्सं ज्ञान कालबिल याइ। लिसें प्रदर्शनीइ बिटुबी प्रदर्शनी, व्यावसायिक बैठक नापं सञ्जाल तब्याकेगु सत्रत नं ग्वसाःग्वयेत्यंगु दु।

Categorized in राष्ट्रिय