मगर समुदायत अप्वः दूगु जिल्लाय् थौं ४३ क्वःगु राष्ट्रिय मगर एकता दिवस थी थी ज्याझ्वः ग्वसाः ग्वयाः न्यायेकेत्यंगु दु।

मगर जातितय्गु म्हसीका, भाषा संस्कृतिया संरक्षण व एकताया निंतिं ज्या यानाच्वंगु सङ्घ–संस्थातय्सं थी थी ज्याझ्वः यानाः थ्व दिवस न्यायेकेत्यंगु खः। नेपाल मगर सङ्घया स्थापनाया झ्वलय् दँय् दसं फागुन १५ गते थ्व दिवस न्यायेकाः वयाच्वंगु खः। आदिवासी जनजाति समुदाय अन्तर्गत लाःगु देय्न्यंकया मगर पुचः, सङ्घ संस्थां थ्व दिवस न्यायेकाच्वंगु दु।

मगरतय्गु साङ्गठनिक नखःया कथं थ्व दिवसयात कायेगु याः। जिल्लाया थी थी थासय् थौं भव्य सांस्कृतिक झाँकी प्रदर्शनलिसेंया सांस्कृतिक ज्याझ्वः जुइत्यंगु दु। नेपाल मगर सङ्घ जिल्ला कार्यसमिति नापं मेमेगु पुचलं पालिकास्तरीय ज्याझ्वःया ग्वसाः ग्वयेत्यंगु दु।

थौं जिल्लाया रामपुर माथागढी, तिनाउ, निस्दीलिसेंया थासय् भव्य सांस्कृतिक ज्याझ्वः यायेत्यंगु दु। थनया १० गू हे स्थानीय तहय् थौं सार्वजनिक बिदा नं ब्यूगु दु। जिल्लाय् ५४ प्रतिशतस्वयां अप्वः मगरतय्गु बसोबास दु। विसं २०३९ फागुन १५ गते नेपाल लाङ्घली परिवार सङ्घया न्हापांगु अधिवेशन क्वचाःगु लुमन्तिइ मगर समुदायं मगर दिवसया कथं न्यायेकेगु न्ह्याकूगु खः।

मगर स्थापना दिवसया झ्वलय् दक्व जिल्लाया जिल्ला मगर सङ्घ, नगर व गाउँपालिकास्तरीय मगर सङ्घलिसें हे विदेशय् च्वंगु मगरलिसे स्वापू दूगु सङ्घ संस्थातय्सं मगर स्थापना दिवसया झ्वलय् थी थी ज्याझ्वःया ग्वसाःग्वयेत्यंगु नेपाल मगर सङ्घं धाःगु दु। पाल्पाय् मगरी कला, संस्कृति तसकं लोकंह्वाः। थनया मगरी कलासंस्कृति झार्मे, सालेजो, कौडा, मारुनी, ठूलो नाच, झ्याउरे संस्कृतिइ मगरलिसें दक्व समुदायतय्सं न्ह्यइपुइकीगु याः। पाल्पाया दक्व स्थानीयतहनिसें वडा–वडा त्वालय् त्वालय् तकं मगर एकता दिवस भव्य जुइक न्यायेकेगु धकाः नेपाल मगर सङ्घ पाल्पाया नायः शान्ति झेडी थापां कनादिल।

नेपाल मगर सङ्घ केन्द्रीय समितिया मातहतय् आः न्हय्गू हे प्रदेशय् प्रदेश समिति, ७७ जिल्ला मध्ये ६८ जिल्लाय् जिल्ला समिति, न्हय्सः व ५३ स्थानीय तहमध्ये न्यासः व ३० गाउँपालिका÷नगरपालिकाय् स्थानीय तहय् समिति गठन जुइ धुंकूगु दु। थौंकन्हय् नेपाल मगर सङ्घय् थी थी क्षेत्रगत, पेसागत व थरगत संस्थात स्वानाः न्ह्यानाच्वंगु दु। सङ्घं मगरतय्त छधी यायेत गन मगर अन मगर सङ्घ, गन मगर सङ्घ अन मगरात स्वायत्तता धइगु साङ्गठनिक नारा दयेकाः साङ्गठनिक अभियान न्ह्याकूगु दु।

Categorized in राष्ट्रिय