नेपालय् ल्हाइगु १२५ भाय्या मंकाः च्वयेगु पद्धति दयेकेगु तातुनाः छगू हे ‘फन्ट’ दयेकूगु दु। नेपाल प्रज्ञा प्रतिष्ठानं नीस्वंगु नेपाःया भाय्या मंकाः लेखन पद्धतिया विकास अध्ययन कार्यदल व आवरण प्रकाशन दथुया सहमति कथं फन्ट निर्माण याःगु खः।

कलाकार रमेश पौडेलं कार्यदलया प्रतिवेदनया कथं ‘दुबो’ नांया ‘फन्ट’या ‘डिजाइन’ यानाः मंगलबाः उगु फन्ट प्रतिष्ठानयात लःल्हाःनागु धकाः धयादिल। आवरण प्रकाशनया प्रबन्ध निर्देशक पौडेलं २२४ ‘क्यारेक्टर’ दूगु ‘दुबो’ फन्ट देवनागरी व ‘युनिकोड’ सिबें ब्यागलं ‘लेआउट’य् जुसां नं छ्यलेत अःपूगु धयादिल।

मंगलबाः प्रतिष्ठानय् ग्वसाः ग्वःगु छगू ज्याझ्वलय् प्रस्तावित फन्टया विषय भाषाविद् नापं सहलह व न्ह्यब्वयेगु ज्या नापं जूगु खः। उगु झ्वलय् भाषाविद् प्राडा माधव पोखरेलं प्रस्तावित फन्टं लिपि मदूपिं तर नेपालय् ल्हाइगु यक्व भाय् दुपिनिगु लेखन पद्धतिइ खनेदूगु समस्या क्वपालेत ग्वाहालि जुइगु विश्वास प्वंकादिल।

प्रतिष्ठानया कुलपति भूपाल राई नं विज्ञ कार्यदलया ग्वाहालिइ न्हूगु फन्ट दयेकागु व थ्व कुतः तसकं ज्या वइगु धयादिल। भाषा आयोगया नायः डा गोपाल ठाकुरं प्रस्तावित फन्टं नेपालय् ल्हाइगु फुक्क भाय्या लेखनय् छगू हे पहः वइगु धयादिल। कार्यदलया कजि डा अमृत योञ्जन तामाङं प्रस्तावित फन्टं नेपाःया भाय्पिनिगु लेखनय् सहजता वइग धयादिल। कार्यदलया दुजः प्रा भीमनारायण रेग्मीं प्रस्तावित फन्टया विशेषता नापं न्ह्यब्वयादीगु खः।

ज्याझ्वलय् प्रतिष्ठानया सदस्य सचिव डा धनप्रसाद सुवेदी, प्रा राम लोहनी, डा कृष्णप्रसाद चालिसे, डा कर्णाखर खतिवडा, दिलेन्द्र सुब्बा, डा सूर्यप्रसाद यादव व राजनलाल जोशीं फन्टया विषय जिज्ञासा नापं टिप्पणी बियादीगु फन्ट दयेकादीम्ह कलाकार पौडेलं धयादिल। प्रतिष्ठानं नीस्वंगु अध्ययन कार्यदलया कजि डा तामाङ, सहसंयोजकय् डा विष्णुकुमार सिंजाली व दुजलय् प्रा भीमनारायण रेग्मी, डा तारामणि राई, अम्बरजङ लिम्बू, प्राज्ञ त्रैलोक्यमान बनेपाली व हंसवती कुर्मी च्वनादीगु खः।

Categorized in राष्ट्रिय