साउदी अरबय् स्वन्हुया शान्ति वार्ता लिपा रुस व युक्रेनं अमेरिकालिसे थीथी सम्झौता यानाः ब्ल्याक सीमाय् युद्धविराम यायेगु सहमति याःगु दु।

रुस व युक्रेन दथुइ व्यापारया संरक्षण व ऊर्जा क्षेत्रय् सैन्य आक्रमण पनेत सहमति जूगु बीबीसीं जानकारी ब्यूगु दु। स्वदँ सिबें अप्वः न्ह्यःनिसें न्ह्यानाच्वंगु रुस व युक्रेन दथुइ युद्ध ३० न्हुया नितिं दिकेगु सहमति जूगु बीबीसीं जानकारी ब्यूगु दु। अमेरिकाया राष्ट्रपति डोनाल्ड ट्रम्पया कूटनीतिक पहलया लिच्वः खः धकाः ह्वाइट हाउसं दाबी याःगु दु।

तर रुसं युद्धविराम लागू जुइ न्ह्यः कृषि व मल निर्यातया निंतिं विश्व बजारय् हाकनं पहुँच कायेत अमेरिकां ग्वाहालि यायेमाःगु शर्त तःगु दु। लिसें बैंक, बीमा कम्पनी, खाद्य निर्यातकर्तायात नं छुं प्रतिबन्ध चीकेमाःगु खँ धाःगु दु। युक्रेनया राष्ट्रपति भोलोदिमिर जेलेन्स्कीं निगू देसं युद्धविरामया सहमति याःसां नं रुसं थुगु शर्तयात कयाः मखुगु खँ ल्हाःगु द्वपं ब्यूगु दु।

जेलेन्स्कीयात रुसं युद्धविराम कार्यान्वयन यायेगु खँय् अझ नं शंका यानाच्वंगु खँ धाःगु दु। युद्धविराम गुकथं कार्यान्वयन जुइ, गुकथं अनुगमन जुइ धइगु नं स्पष्ट मजूनि।

Categorized in अन्तर्राष्ट्रिय