लगानी व लिच्वः सुनिश्चित जूसा भारतीय व्यापारिक घरानातय्सं नेपाःया ऊर्जा ख्यलय् लगानी यायेत थःपिं तयार दु धकाः धाःगु दु।

भारतय् च्वंगु नेपाःया राजदूतावास व भारतीय हरित ऊर्जा महासङ्घया मंकाः ग्वसाः नापं स्वतन्त्र ऊर्जा उत्पादकय् संस्था, नेपाल (इप्पान)या संस्थागत ब्वतिइ न्हू दिल्लीइ ग्वसाः ग्वःगु ‘नेपाल–भारत इनर्जी समिट’य् ब्वति काःगु भारतया व्यावसायिकतय्सं, नेपालय् भारतीय लगानीया नीतिगत सुरक्षा जुइ माःगुलिइ बः ब्यूगु खः।

इमिसं लगानी यायेधुंकाः लिच्वःया सुनिश्चितता, सहज जुइक लगानी लितकाये दये माःगुलिसें जलविद्युत् आयोजनां फयेमाला च्वंगु समस्या ज्यंकेत सरकारं सहजीकरण यायेमाः धकाः धाःगु खः। नेपालय् ९०० मेगावाटया अरुण स्वंगूगु जलविद्युत् आयोजना निर्माण यानाच्वंगु भारतीय कम्पनी सतलज जलविद्युत् निगम (एसजेभीएन)या आयोजना निर्देशक सुशील शर्मां नेपालय् ज्या यायेत वन, जग्गा कायेगु, भन्सार व सतकया समस्या दयाच्वंगुलिं उगु समस्या ज्यंकेगुलिइ सरकारं सहजीकरण यानाच्वंगु न्ह्यथनादिल।

एसजेभीएनं २१७ किलोमिटर ताःहकःगु प्रसारणलाइन निर्माण यानाच्वंगु व सरकारया ग्वाहालि दूगुलिं ९०० मेगावाटया आयोजना स्वदँ दुने हे ८४ प्रतिशत पूवंगु वय्कःया धापू खः। अरुण–३ य् ३४००० क्वति भारतीय रुपैयाँ लगानी यानाः २५ दँलिपा सरकारयात लःल्हायेगु जूगुलिं थुकिं नेपालया अर्थतन्त्रय् तःधंगु ग्वाहालि जुइगु वय्कःया दाबी खः। थुगु आयोजनां भारतीय लगानीकर्तातय्त नेपालय् आकर्षित याइ धकाः शर्मां कनादिल।

अडानी ग्रुपया न्वकू जयरमन पुनिधानं नेपाःया जलविद्युत् ख्यलय् लगानी यायेत कम्पनीं बांलाःगु आयोजना माला च्वना धकाः धयादिल। हलिन्यक २७ द्वः व ३०० मेगावाट विद्युत् उत्पादन यायेत अडानी ग्रुपं ‘एमओयू’ याःगु जानकारी बियादिसें वय्कलं अडानीया प्राथमिकताय् जःलाखःला देय् व क्षेत्रीय ऊर्जा बजाः लाना च्वंगु धयादिल। भारतीय ऊर्जा मन्त्रालयया अतिरिक्त सचिव आकाश त्रिपाठीं नेपाल व भारतदथुइ द्वःछि मेगावाट विद्युत् कालबिलया संरचना तयार जुइधुंकूगु व च्याद्वः मेगावाट विद्युत् कालबिल यायेगु क्षमताया प्यंगू प्रसारणलाइन निर्माणाधीन जुयाच्वंगुलिं नेपालय् उत्पादित विद्युत् भारत निर्यातया निंतिं समस्या जुइमखु धकाः धयादिल।

उत्तर भारत हाइड्रोपावर कम्पनीया कार्यकारी निर्देशक नरेश गोयलं नेपाल सरकारं प्रशासनिक पंगः चीकाः लगानीया वातावरण दयेकाब्यूसा भारतीय लगानीकर्तात नेपालय् लगानी यायेत तयार दूगु धयादिल। भारतया निंतिं नेपाली राजदूत डा शंकर शर्मां नेपाल सरकारं न्ह्याकूगु सन् २०३५ तक २८ द्वः व ५०० मेगावाट विद्युत उत्पादनया आज्जुइ थ्यंकेत दूतावासं सम्मेलन आयोजना याःगु धकाः धयादिल।

वय्कलं भारतीय लगानीकर्तातय्सं नेपालय् आयोजनाया स्वामित्व न्यानाः वा ‘जोइन्ट भेन्चर’य् नं ज्या यायेफइगु जानकारी बियादिल।

Categorized in राष्ट्रिय