नेपाः राष्ट्रिय पार्टी न नेकपा माओवादी केन्द्रलिसे पार्टी एकता याःगु दु।

थौं सोमवाः न्हिनय् येँया नेपाः ब्यांक्वेटय् माओवादी केन्द्रया नायः पुष्पकमल दाहाल प्रचण्ड व नेपाः राष्ट्रिय पार्टीया नायः डा विजय सैजुं प्यंगू बुँदे सहमति पतिइ ल्हाःचिं तया निगू पार्टी छगू जूगु घोषणा याःगु खः।

निगू पार्टीया नायःपिं दथुइ जूगु प्यंगू बुँदे सहमतिइ पहिचानया मुद्दा व पहिचान सहितया संघीयता सुनिश्चित यायेगु नितिं राज्य पुनःसंरचना आयोगं ब्यूगु प्रतिवेदनयात आधार दयेकाः ज्या न्ह्याकेगु, माओवादी केन्द्रं न्ह्याकाच्वंगु प्रत्यक्ष निर्वाचित राष्ट्रपतियात अंगीकार यानाः संविधान संशोधन यायेगु व थुकी माल धाःसा मेमेगु अग्रगामी थीथी मुद्दायात दुथ्याकेगु, नेपाल कम्युनिष्ट पार्टी माओवादी केन्द्रपाखें नेवाः समुदायया भाषा लिपि लिसें स्वनिगः लगायत देय्या थीथी लागाय् दूगु संस्कृति सम्पदाया संरक्षणयात विशेष बः बिइगु, नेवाः समुदाय नं परापूर्व कालनिसें न्ह्याकाच्वंगु संस्कृति परम्परा रितिथिति इत्यादी दक्वसित विशेष संरक्षण व प्रवद्र्धन यायेत प्रतिबद्धता जुइगु, थुकिया नितिं छगू अधिकार सम्पन्न उच्चस्तरीय सांस्कृतिक सम्पदा संरक्षण व प्रवद्र्धन प्राधिकरण नीस्वनेत पहल यायेगु व दकले लिपांगु बुँदाय् पार्टी एकीकरण नापनापं नेपाः राष्ट्रिय पार्टीया नायः लिसें केन्द्रीय समितिइ च्वंपिं सकल दुजःपिन्त नेकपा माओवादी केन्द्रय् सम्मान जनक थाय् व जिम्मेवारी बिइगु नितिं व्यवस्था यायेगु खँ न्ह्यथनातःगु दु।

पार्टी एकीकरण ज्याझ्वःया सभापतित्व यानादीम्ह नेपाः राष्ट्रिय पार्टीया डा विजय सैजुं पहिचानसहितया संघीयता प्राप्तिया नितिं माओवादी केन्द्रनाप पार्टी एकता यानागु खँ उद्घोष यानादीगु खः। ज्याझ्वलय् माओवादी केन्द्रया नायः प्रचण्डं माओवादी पार्टी धात्थें नेवाःतय्गु मुद्दा सम्बोधन याइगु पार्टी जूगु धासें वय्कलं नेवाःतसें ल्ह्वनाच्वंगु नेपाल संवतया माग, भाषाया माग व नेवाः अधिकारया माग माओवादी पार्टीं पूवंकूगु धासें आः माओवादी केन्द्र वइगु चुनावपाखें सरकारय् वन धाःसा नेवाःतय्त मन्त्री दयेकेगु इच्छा दूगु खँ नं कनादिल। ज्याझ्वलय् माओवादी केन्द्रीय समितिया दुजः दिलीप महर्जन, माओवादी केन्द्रया बागमती प्रदेशया इञ्चार्ज हितमान शाक्यपिनिगु न उपस्थित दुगु खः।

Categorized in राजनीति