प्रधानमन्त्री केपी शर्मा ओलीं थःगु निंतिं थःम्हेस्यां ल्यये दइगु सङ्घीय लोकतान्त्रिक गणतन्त्रात्मक शासन व्यवस्थाया विकल्प मदूगु धयादीगु दु।

गणतन्त्र दिवस, २०८२ या लसताय् तिंख्यलय् ग्वसाः ग्वःगु विशेष समारोहयात सम्बोधन यानादिसें प्रधानमन्त्री ओलीं फुक्क नागरिकया आत्मसम्मान सुरक्षित जुइगु गणतान्त्रिक व्यवस्थाया विकल्प मेगु जुइ मफइगु धयादिल। गणतान्त्रिक शासन व्यवस्थाय् शिक्षा, स्वास्थ्य, उद्यम, लजगाः, पूर्वाधारलिसेंया ख्यलय् अतुलनीय उपलब्धिलिसें ह्यूपाः जूगु धयादिसें वय्कलं गणतन्त्रयात अझं सुदृढ व बल्लाकेत झी सकलें छधी जुइमाःगु खँय् बः बियादिल। प्रधानमन्त्रीं धयादिल, “सुशासन, पारदर्शिता व उत्तरदायित्व गणतान्त्रिक व्यवस्थाया दुगः क्वँय् खः, झी थुकियात बल्लाकेत जुयाच्वनागु दु।

समृद्ध नेपाः सुखी नेपाःमिया राष्ट्रिय आकाङ्क्षा पूवंकेत जुयाच्वनागु दु।”वय्कलं धयादिल, “गणतन्त्र छुं दलया स्वामित्व मखु थुकिया थुवा जनता खः। लोकतान्त्रिक गणतन्त्र ‘जनतापाखें जनताया निंतिं जनताया शासन प्रणाली’ खः। थुकिया भावनाकथं झीगु प्रणालीइ जनतां हे वडा सदस्यनिसें राष्ट्रपति तक थःम्हेस्यां ल्ययेगु व हिले फइ। अथे जुयाः बांला बाय् बांमलाया उत्तरदायित्व नं जनताया हे ल्हातय् दु।” प्रधानमन्त्री ओलीं आः जनतां मतदान यानाः, वडाया सदस्यनिसें देय्या राष्ट्रपतितक समावेशी कथं थीथी जात÷जाति व समुदायया म्होतिं ३६ द्वः व ५७ म्ह प्रतिनिधितत ल्ययेगु व्यवस्था दूगु प्रष्ट यानादिल।

वय्कलं धयादिल, “गणतन्त्र वयेन्ह्यः देय्या विकास सूचकाङ्कत गन दु, आः गन थ्यन। गणतन्त्र वये न्ह्यः मानव विकास सूचकाङ्क गन दु, आः गन थ्यन । राजतन्त्र दूबलेया २५० दँय् गुलि ब्वनेकुथि, गुलि अस्पताल दु, आः गुलि थ्यन । राजतन्त्रकालय् सतक गुलि किलोमिटर दु, आः गुलि थ्यन, गरिबी गुलि दु, गुलि म्हो जुल, त्वनेगु लः व बिजुलीया सुविधा गुलि जनताय् दूगु खः व आः गुलिइ थ्यन ।

जनताया जीवनस्तर गन दुगु खः, आः गन थ्यन। थ्व फुक्कं उपलब्धि गणतन्त्रपाखें जुइफूगु खः।” प्रधानमन्त्री धयादिल, “थौंया दिं, झी सकसिया निंतिं विशेष दिं खः । तःदँया सङ्घर्ष, सलंस तता केँहे, दाजुकिजापिनिगु बलिदान व झी सकसिया मदिक्क मेहनतपाखें २०६५ साल जेठ १५ गते देसय् लोकतान्त्रिक गणतन्त्रया पलिस्था जूगु दिं। थ्व ऐतिहासिक दिंया लुमन्तिइ थौं झी गणतन्त्र दिवस न्यायेकाच्वना । गणतन्त्र–झीसं कयागु मखु, हयागु खः – सलंस जनताया बलिदानपाखें व त्यागपाखें।

मुकुटया हुकुमी आदेशपाखें न्ह्याइगु राज्य प्रणाली थुनाछ्वयाः जनताया नुगलं याःगु निर्णयपाखें देय् न्ह्याइगु प्रणाली निस्वनागु खः । झीगु समाजं तिप्यंकूगु उगु गौरवपूर्ण दिवसया मू झीसं गबलें ल्वमंके फइमखु, ल्वमके मखु। ” 

Categorized in राष्ट्रिय