परराष्ट्रमन्त्री डा आरजु राणा देउवा जनवादी गणतन्त्र चीनया विशेष प्रशासकीय क्षेत्र हङकङय् चीन सरकारपाखें थ्वहे जेठ १६ गते ग्वसाः ग्वःगु अन्तरराष्ट्रिय मध्यस्थता सङ्गठन निस्वनेगु महासन्धिया ल्हाःचिं समारोहय् ब्वति कयाः म्हिगः बहनी स्वदेश लिहांझाःगु दु।

चिनियाँ विदेशमन्त्री वाङ यीया ब्वनाय् उगु समारोहय् ब्वति कयादीत मन्त्री डा राणा बुधबाः हङकङ झायादीगु खः। नेपाः उगु सङ्गठन निस्वनेगु सम्बन्धी महासन्धीया ल्हाःचिं ज्याझ्वलय् पर्यवेक्षकया कथं ब्वति कयादीगु परराष्ट्र मन्त्रालयं धाःगु दु।उगु महासन्धिइ ३२ गू देसं ल्हाःचिं तःगु खःसा उगु समारोहय् ५० गू सिबें अप्वः देय् व २०गू सिबें अप्वो अन्तरराष्ट्रिय सङ्घसंस्थां ब्वति काःगु खः।

उगु सङ्गठनं थीथी देय् दथुइ, छगू देय् व मेगु देय्या कम्पनी बाय् नागरिक दथुइ लिसें थीथी देय्या निजी बनेज्यामिपिं दथुया विवादयात मध्यस्थतापाखें समाधान यायेगु तातुनां तःगु दु। अथे हे, ज्याझ्वःया दथुइ मन्त्री डा राणां चिनियाँ विदेशमन्त्री वाङ यीनाप नापलानादीगु खः। उगु नापलायेगु झ्वलय् नेपाः व चीन दथुया मैत्रीपूर्ण स्वापू अझं सुदृढ यानाः यंकेगु विषय खँल्हाबल्हा जूगु मन्त्री डा राणां धयादिल।

वय्कलं नापलायेगु झ्वलय् नेपाः व चीन दथुइ आर्थिक, प्राविधिक लिसें व्यावसायिक स्वापू तब्याकेगु नापं चिनियाँ ग्वाहालिइ नेपालय् निर्माणाधीन परियोजनात इलय् हे क्वचायेकेगु विषयस खँल्हाबल्हा जूगु धयादिल। मन्त्री डा राणां धयादिल, “थुगुसी सन् २०२५ नेपाः व चीन दथुइ कूटनीतिक स्वापू पलिस्थाया ७० क्वःगु वर्षगाँठ लाःगुलिं थ्व ई यात विशेष ज्याझ्वःलिसें न्यायेकेगु व निगू देय् दथुइ उच्चस्तरीय भ्रमणत कालबिल यायेगु ज्यायात निरन्तरता बिइगु विषयस नं खँल्हाबल्हा जूगु दु।”

मन्त्री डा राणां नेतृत्व यानादीगु थुगु नेपाली प्रतिनिधिमण्डलय् परराष्ट्र मन्त्रालयया उत्तरपूर्वी एसिया महाशाखाया प्रमुख भृगु ढुङ्गाना व हङकङय् च्वनादीम्ह नेपाःया महावाणिज्यदूत डा विन्देश्वरप्रसाद लेखकलिसें परराष्ट्र मन्त्रालय व महावाणिज्य दूतावास हङकङया प्रतिनिधितय्सं ब्वति कयादीगु खः।

Categorized in राष्ट्रिय