येँ महानगरपालिकां सतक पेटीइ पुलांगु टायल लिकयाः न्हूगु टायल तयेगु झ्वलय् ल्याःचाः गोलमाल जूगु खँ महालेखा परीक्षणया रिपोर्टय् न्ह्यथनातःगु दु।

येँ महानगरपालिकां पुलांगु टायलया ल्याःचाः तयामतःगु महालेखाया लिपांगु प्रतिवेदनय् न्ह्यथनातःगु दु। आर्थिक दँ २०८०÷८१ सं येँ महानगरपालिकां सतकया जःखःया पेटीइ पुलांगु टायर लिकानाः न्हूगु रंगिन टायल तःगु खः। थ्यं मथ्यं ६० किलोमिटर टायल तःगु खःसा उकिया ल्याःचाः सडक डिभिजन कार्यालयं फ्वंगु खःसा उकिया ल्याःचाः धाःसा येँ महानगरपालिकां बी फयाच्वंगु मदु।

सडक डिभिजन कार्यालयं पुलांगु टायल थःगु सम्पत्ति जूगु धासें ल्याःचाः फ्वंगु खः। सतक डिभिजन कार्यालयं टायलया ल्याःचाः फ्वनेवं येँ महानगरपालिकां छुं भचा टायल बुझे यानाः काः धकाः धाःगु खःसा सतक डिभिजन कार्यालय उकियात बुझे यानाः कायेत माने मजूगु खः।पुलांगु टायल मदयेवं महालेखा परीक्षकया लिपांगु प्रतिवेदनय् गम्भीर न्ह्यसः थंगु खः।

दयेकातये धुंकूगु संरचना स्यंकेगु झ्वलय् संरचनाया प्रकृति कथं उकी छ्यःगु सामग्री हाकनं छ्यलेगु भण्डारण यायेगु लिसे लिलाम यानाः मीगु मापदण्ड दयेकेमाःगु खँ नं प्रतिवेदनय् न्ह्यथनातःगु दु। महालेखाया प्रतिवेदनय् धयातःगु दु, ‘महानगरपालिकां ठेक्का व्यवस्थापन यायेगु झ्वलय् फुटपाथय् दुगु पुलांगु टायल लिसे ल्वहँ व उकिया ढुवानी यानाः व्यवस्थापनया निंतिं विओक्यय् व्यवस्था यानातःगुलिं थुकथं स्यंकूगु टायल सिे ल्वहँ गुलि हाकनं छ्यले फइ वा फइमखु उगु खँ न्ह्यथनातःगु मदु व छ्यले जिउगु ब्लक व ल्वहँया हाकनं छ्यलेगु कथं मौज्दात तयेगु सम्बन्धय् स्पष्ट व्यवस्था याःगु खनेमदु।

थुकथं पुलांगु टायल व ल्वहँ स्यंकेगु झ्वलय् छुं प्रतिशत छ्यले फइगु अवस्था दुगुलिं सरकारी सम्पत्तिया सदुपयोगु जूगु खनेमदु।उकथं हे लेखा परीक्षणया झ्वलय् तिनकुने गौशाला फुटपाथं पिहां वःगु ब्लव व कर्ब स्टोन महानगरपालिकां नेपाल आर्मी व सशस्त्र प्रहरीं फ्वंगुलिं बियागु धकाः लिसः बिउगु खःसा ल्यँ दनिगु सामग्रीया धाःसा अभिलेख मलूगु खँ नं धयातःगु दु।

Categorized in राष्ट्रिय