अमेरिकां प्रतिनिधिसभाय् सरकारी उपकरणय् ह्वाट्सएप छ्यलेत प्रतिबन्ध तःगु दु।

अमेरिकाया प्रतिनिधिसभां थःगु फुक्क सरकारी उपकरणय् म्यासेजिङ एप ह्वाट्सएपयात पूर्ण रुपं प्रतिबन्ध तयेगु निर्णय याःगु दु। डाटा सुरक्षाया गम्भीर चिउताःया कारणं थुज्वःगु पलाः न्ह्याकूगु धका धाःगु दु।अमेरिकाया प्रतिनिधिसभाया साइबर सुरक्षा एजेन्सीं सार्वजनिक याःगु छगू सरकारी दस्तावेजय् ह्वाट्सएपयात उच्च जोखिमया एप धासें संसदया सकलें कर्मचारीतय्त उगु एप चीकेत आदेश ब्यूगु दु

ह्वाटस् एपयात छाय् प्रतिबन्ध ?

रोयटर्स लिसेंया संचार माध्यमय् प्रकाशित समाचार कथं अमेरिकाया प्रतिनिधिसभा हाउस साइबर सुरक्षा ज्याकुथिं फुक्क कर्मचारीतय्त छ्वःगु निर्देशनात्मक ज्ञापनपत्रय् ह्वाट्सएपयात प्रयोगकर्ताया गोपनीयता व डाटा सुरक्षाय् पारदर्शिता मदुगु एप धकाः वर्णन याःगु दु। ह्वाट्सएपय् भण्डारण यानातःगु डाटा इन्क्रिप्ट मजूगुलिं साइबर आक्रमण, फिसिङ आक्रमण, संवेदनशील सुचं खुइगु व लिक जुइगु उच्च जोखिम दुगु दाबी उगु ज्ञापनपत्रय् न्ह्यथनातःगु दु । प्रतिनिधिसभाया प्रमुख प्रशासकीय अधिकृतया ज्याकुथिं कर्मचारीपिन्त छ्वःगु इमेलपाखें कडा निर्देशन ब्यूगु दु ।

थुकी च्वयातःगु दु ः यदि छिगु डिभाइसय् ह्वाट्सएप दुसा उगु एप लिकायेत स्वापू तइ । थ्व आदेश मोबाइल फोन, ल्यापटप वा वेब ब्राउजरय् छ्यलीगु फुक्क उपकरणय् लागू जुइ।

संसदीय कर्मचारीतय्सं छ्यलीगु फुक्क सरकारी उपकरणपाखें ह्वाट्सएप चीकेत आदेश ब्यूगु अमेरिकी कांग्रेसं थः कर्मचारीतय्त सुरक्षित सन्देशया निंतिं वैकल्पिक प्लेटफर्म व एप छ्यलेत नं निर्देशन ब्यूगु दु।

अथे सिफारिस याःगु एपSignal, Microsoft Teams, Wickr, Apple iMessage, FaceTime  खः। साथै, दक्को कर्मचारी तयेत अपरिचित नम्बरपाखे वःगु शंकास्पद सन्देशप्रति सचेत जुइत धाःगु दु।