प्रधानमन्त्री केपी शर्मा ओली युरोपेली देय् स्पेनया औपचारिक भ्रमणया निंतिं नेपाली प्रतिनिधिमण्डलया नेतृत्व यानादिसें आः वइगु शनिबाः उखेपाखे झायादीत्यंगु दु। वय्कलं स्पेनया औपचारिक भ्रमणया झ्वलय् अन थ्व हे असार १६ निसें १९ गतेतक जुइगु ‘विकासया निंतिं वित्तसम्बन्धी प्यक्वःगु अन्तर्राष्ट्रिय सम्मेलन’य् ब्वति कयादी त्यंगु दु।

प्रधानमन्त्रीया औपचारिक भ्रमणया फुक्क्कं तयारी पूवने धुंकूगु व लसकुसया निंतिं स्पेनया नेपाली समुदाय उत्सुक व उत्साहित जुयाच्वंगु स्पेनया निंतिं नेपाली राजदूत शनिल नेपालं धयादिगु दु। भ्रमणया झ्वलय् प्रधानमन्त्री ओलीं थः समकक्षीनाप निगू पक्षीय खँल्हाबल्हा यानादीत्यंगु दु।

उगु झ्वलय् ग्वाहालि व स्वापू तब्याकेगु बारे छुं महत्वपूर्ण विषय नेपाः व स्पेनया दथुइ सहमति पत्रय् ल्हाःचिं तइगु जुइ। प्रधानमन्त्रीं भ्रमणया हे झ्वलय् अन च्वंपिं नेपाली समुदाय व स्पेनिस उद्योगी व्यवसायी नाप नं अन्तरक्रिया यानादीत्यंगु दु। सम्मेलनया झ्वलय् प्रधानमन्त्रीं मेमेगु नं महत्वपूर्ण निगूपक्षीय नापलायेगु ज्याझ्वः न दु धका दूतावासं धाःगु दु।

स्पेन संसदीय प्रजातन्त्र व संवैधानिक राजतन्त्रात्मक शासन व्यवस्था दूगु पश्चिम युरोपेली देय् खः। थ्यंमथ्यं न्यागू लख न्याद्वः व ९९० वर्ग किलोमिटर क्षेत्रफलय् चकनाः च्वंगु स्पेनया जनसङ्ख्या थ्यंमथ्यं ४ करोड ७४ लख दु।

Categorized in राष्ट्रिय