सूर्यविनायक नगरपालिका–८ जगाती चुकय् न्ह्यानाच्वंगु सूर्यविनायक नगर अस्पतालयात बागमती प्रदेश सरकारया स्वास्थ्य मन्त्रालयं न्यय्गू शय्याय् विस्तार याःगु दु।

प्रदेश स्वास्थ्यमन्त्री किरण थापा वहे वडाया तत्कालीन वडाअध्यक्ष जूयादीगु इलय् विसं २०७७ य् झिगू शय्यापाखें सेवा न्ह्याकूगु अस्पताल बुधबाः वय्कः स्वास्थ्यमन्त्री जूया च्वनादीबलय् न्यय्गू शय्याय् विस्तार याःगु खः।मन्त्री थापां थुकिया बारे धयादिल, “कोरोना महामारीं तसकं भ्वा ब्वःगु अवस्था जुयाः च्वंगु खः, उगु इलय् जि वडाध्यक्ष, एमाले नेता महेश बस्नेत सांसद जुया च्वनादीगु खः।

नगरपालिकाया प्रमुख आः याम्ह हे प्रमुख वासुदेव थापा जुयादी, जिपिं सकसिया कुतः व मंकाः ज्यां नेपाल सरकारया नीन्यापी जग्गाय् अस्पताल भवन निर्माण यानाः सेवा न्ह्याकागु खः। उकिया प्यदँ लिपा जि स्वास्थ्यमन्त्री जुया च्वनाु इलय् न्यय्गू शय्याय् विस्तार याये खनाः तसकं लय्तानाच्वना।”

सूर्यविनायक नगर अस्पतालयात विशेषज्ञ सेवालिसेंया ट्रमा सेन्टरया कथं विकास यायेगु योजना दूगु वय्कलं धयादिल। पूर्वया जिल्लां स्वनिगः दुहां वयेगु लिपांगु नाका जगाती जूगुलिं राजमार्गय् जुइगु दुर्घटनापाखें घाःपाःया वासः यायेगु तातुना थ्व अस्पतालयात ट्रमा सेन्टरया कथं विकास यायेगु यानाः ज्या न्ह्याकागु मन्त्री थापां धयादिल।

“मन्त्रालयं माः कथं थप जनशक्ति, उपकरण व बजेटया व्यवस्थापन याइ। अरनिको राजमार्गनाप स्वाःगु थ्व अस्पतालय् ख्वपया जक मखुसें पूर्वं वइपिं बिरामीतय्त येँय् वने हे म्वायेकेगु कथं विकास लिसें विस्तार याये माःगु दु। व हे कथं न्ह्याःवनाच्वनागु नं दु”, वय्कलं धयादिल।

सूर्यविनायक नगरपालिकाया प्रवक्ता लिसें वडा ल्याः ७ या वडाध्यक्ष रवीन्द्र सापकोटां प्रदेश सरकारया स्वीकृति व नगरपालिकाया बजेट व्यवस्थापनपाखें शल्यक्रिया कक्षनापं सञ्चालनय् वःगु व गुणस्तरीय सेवा सञ्चालनया निंतिं नगरपालिकां बजेट लिसेंया ब्यवस्थापन यायेगु धयादिल।

Categorized in राष्ट्रिय