अख्तियार दुरुपयोग अनुसन्धान आयोगया पुचलं भूमि सुधार लिसें मालपोत ज्याकुथि ख्वपया ज्याकुथि प्रमुखलिसें स्वम्हेसित नियन्त्रणय् काःगु दु।

ख्वप चाँगुनारायण नगरपालिकाय् च्वंगु झिंप्यपी प्यंगू आना जग्गा मोही व तःसिंया लगत कट्टा यानाः उगु जग्गा मोहीया नामय् जग्गाधनी प्रमाणपुर्जा दयेकेगु निंतिं नीप्यंगू लख न्यय् द्वः घुस फ्वंगु उजुरीया लिधंसाय् नियन्त्रणय् काःगु अख्तियार दुरुपयोग अनुसन्धान आयोगया प्रवक्ता राजेन्द्रकुमार पौडेलं धयादिल।

वय्कलं धयादिल, “जग्गा मोही व तःसिंया लगत कट्टा यानाः उगु जग्गा मोहीया नामय् धनी प्रमाणपुर्जा दयेकाबीगु निंतिं उगु ध्यबा घुस फ्वंगु उजुरी निवेदनया लिधंसाय् उमित नियन्त्रणय् कयागु खः।”आयोगया टङ्गालपाखें वंगु पुचलं ज्याकुथि प्रमुख कुमार आचार्ययाके च्वंगु मोबाइल फोन निगः व भूमिसुधार शाखाया नायब सुब्बा दीपकप्रसाद अधिकारीयाके च्वंगु मोबाइल छगः लिसें ज्याकुथि ग्वाहालिमि टीकाराम राउतयाके च्वंगु मोबाइल छगःलिसें घुस ध्यबा नीप्यंगू लख न्ययद्वः तका नापं ज्याकुथिं हे म्हिगः नियन्त्रणय् कयाः थप अनुसन्धान जुयाच्वंगु प्रवक्ता पौडेलं धयादिल।

अथे हे यातायात व्यवस्था ज्याकुथि सवारी चालक अनुमतिपत्र कास्कीइ ज्या याइम्ह ज्याकुथि ग्वाहालिमि दीपक पौडेलं सवारी चालक अनुमतिपत्रया अनलाइन फारम भरे यानाः बिइगु व लिखित परीक्षा पास यानाः ट्रायल परीक्षाय् नापं पास यानाः बिइ धकाः सेवाग्राहीनाप घुस ध्यबा फ्वंगु द्वपनय् म्हिगः हे नियन्त्रणय् काःगु दु।

आयोगया ज्याकुथि, पोखरां वंगु पुचलं उम्ह ज्याकुथि ग्वाहालिमि दीपक पौडेलयात सेवाग्राहीनाप न्हयय्द्वः तका घुस कयाच्वंगु अवस्थाय् उगु ध्यबा नापं नियन्त्रणय् कयाः थप अनुसन्धान जुयाच्वंगु आयोगं धाःगु दु।

Categorized in अपराध