ज्वमदुम्ह स्वतन्त्र
विजयरत्न असंबरे | गुंलाथ्व पारु ११४५, सावन ९ शुक्रवाः
मुसुमुसु न्हिलाच्वंगु ख्वाः । गथे याना ल्वमंके । सदां लुमना च्वनी । नेपालभाषाया गीतसंगीत व संकिपाख्यःयात मतिना याइम्ह छ । जि नं अथे हे याना च्वनाम्ह । झी निम्ह नापलाना तुं च्वं । आः नापलाइ मखुत धइगु खँ जितः वाथावाथा कंकल । छ नं दक्व धइथें ज्याझ्वलय् थ्यनी । जि नं । अझ उलिजक मखु , जित छंगु नापसां हे फ्यतुकि । दाइ धका आदर क्यनी । आः याइ मखुत ।
जिपिं निम्ह नापलागु धइगु साउनया २० गते वयागु ह छेँय् खः । अन “ल्यासे स्वःजुल” म्येया पितब्वज्या । गीतसंगीत व कला ख्यलय् साप हे नुगः क्वसाम्ह स्वतन्त्र संसार महर्जन छम्ह अभिनय याइम्ह कलाकार ला खः हे खत । न्हापांनिसें अझ धायेगु खःसा मचाबलेनिसें दबुलिइ दँवःम्ह छम्ह ज्वमदुम्ह कलाकःमि खः । स्वतन्त्रं निफ्वःस्वाँ, ये जि यःम्ह, जिपिं बदमाश मखु, माया, थ्व जिगु नुगः, इहिपा थेंजागु छगू दर्जन नेवाः फिल्मय् अभिनय यात । पियाच्वना, हसना थेंजाःगु फिल्मया निर्देशन नं यात ।
लिपांगु इलय् ‘टाढा नजाउ’ बोलया खस नेपाली भायया म्येय् नं अभिनय यात । वयागु ‘कृष र कोहीनूर’ नांयागु छगू खस नेपाली फिल्म व ‘कलयुगया कृष्ण’ नांयागु छगू फिल्म धाःसा शुटिंग हे जुइ मफुत । स्वतन्त्रया ‘ज्वजलपा‘ नांया नं छगू फिल्म दयेकेगु ग्वसाः दूगु खः । व ग्वसाः नं न्ह्याःमवन । सदां न्ह्याःवना च्वनिम्ह स्वतन्त्रया पलाः यात आकाझाकां इमाचां दाःथें कालं दाया यंकल । वयागु आत्मकथा पिकायेगु इच्छा नं आःयात दित । थ्व ‘स्वतन्त्र संसार महर्जन–झीरमा उनिएको मान्छे’ नांयागु आत्मबृत्तान्त च्वयेगु भाला कयातःम्ह दिपक विवश आँशुं आः थ्व गथे याना पूवंकेगु धकाः चिउता प्वंकाच्वंगु दु ।
पीदँ पीन्यादँया वैंशय् हे जीवनया अन्तिम इलय् थ्यंम्ह स्वतन्त्रया दकलय् लिपांगु कलाकारिता धइगु वयागु गायन ख्यलय् न्ह्याकूगु पलाः जुयाबिल । नांजाम्ह उद्यमि समाजसेवी गायिका सरिता महर्जनलिसे हालातःगु ‘ल्यासे स्वःजुल’ म्येया पितब्वज्या वयागु लिपांगु कला कर्म जुयाबिल । खय्त ला वसिबें लिपा नं वयागु हे छेँय् गायक राजेन्द्र डंगोलया ‘न त स्वैतं कनेजिउ’ म्येया पितब्वज्या नं जूगुृ खः । उके वयागु कलाकारिता धाःसा मदु ।
]
शनिबार पत्तिकं थःगु हे छेँय् संसार संगीतालय धका सांगितिक ज्याझ्वः न्ह्याका संगीतख्यलय् क्वसाःगु थःगु नुगः ब्वयावयाच्वंम्ह खः स्वतन्त्र । विशेष यानाः हलिमय न्यंकभनं कोरोनाया हाहाकार जुयाच्वंगु इलय् छेँय् च्वनाः म्ये हालिगु लहर न्ह्याःगु इलय् स्वतन्त्रं छगू अनलाइन म्ये कासा हे यानाः सांगितिक प्रतिभायात पिलूवयेगु लकस दयेका बिउम्ह खः ।
]गिनिज बूक अफ वल्र्ड रेकर्डय् नां तयेगु तातुना संसारया हे दकलय् तःधंगु म्युजिक भिडियो अवार्ड कथं ‘संसार नेशनल म्युजिक भिडियो अवार्ड’ ताःलाक्क हंम्ह स्वतन्त्रया पलाखं वल्र्ड रेकर्डया ख्वाः स्वये दइ तिनि ।
उगु ज्याझ्वलय् मुक्कं ४१ विधाय् १७२ म्ह सर्जकपिंत अवार्ड लःल्हाःगु खः । दकलय् ताः ई बिइगु अवार्ड व दकलय् यक्व विधाय् अवार्ड लःल्हायेगु धकाः विश्व रेकर्ड गिनिज बुक अफ वल्र्ड रेकर्डय् दुथ्याकेगु तयारी जुयाच्वंगु दु । थ्व ज्याझ्वलय् नेपालभाषाया गीत÷संगीत क्षेत्रय् जीवन पानाः क्रियाशील जुयादीम्ह गायक व संगीतकार रत्न ‘बेहासी’ वज्राचार्ययात नगद २५ हजार राशीलिसें लाइफटाइम अचिभमेन्ट अवार्ड नं देछाःगु खः ।
न्ह्यलुवा कलाकार पवन जोशीयात झिंन्याद्वः तका दां लिसें मल्टिमिडिया स्टार अवार्ड देछाःगु उगु अवार्डय् नेपालभाषा म्युजिक भिडियोया न्हापांम्ह निर्देशक विजयरत्न तुलाधर असंबरेयात सम्मान कथं अवार्ड देछाःगु खः । थीथी विधाय् प्रतिस्पर्धात्मक कथं अवार्ड बिउगु उगु ज्याझ्वलय् न्ह्यलुवाः कलाकःमिपिं आशाकाजी थकू, कृष्णभक्त महर्जन, संगीता शाक्य, जुगल डंगोल, रामकृष्ण खड्गीयात ‘संसार तेज बहादुर स्मृति अवार्ड’ देछाःगु खःसा सरस्वती मानन्धर, बुद्ध साय्मि, रबि साय्मि, अनिल तुलाधर, सुरेन्द्र मानन्धर, निशा देशार व विश्वास वज्राचार्ययात ‘संसार सप्तरंगी सम्मान’ देछाःगु खः ।
स्वतन्त्र संसार महर्जनया कुतलय् थापना जूगु संसार संगीतालयया संरक्षक म्येहालमि सरिता महर्जनं स्वतन्त्रलिसे हाःगु म्ये ल्यासे स्वःजुल या प्रिमियरय इलय् संगीतख्यलय् नुगः क्वसाम्ह सरिता महर्जनं संसार संगीतालय सुथांलाक्क न्ह्याकायंकेत ग्वाहालि जुइमा धका न्यागुत्या लख दाँ नं लःल्हागु खः ।
संगीत संकिपा व कला मनोरन्जनख्यलय् दिपा मदिक्क पलाः न्ह्याकाच्वंम्ह स्वतन्त्रया कुतलं संसार्स ग्रुप धका कलाह्यःमि पिनिगु पुचः छगू निस्वनातःगु दुसाः संसार्स क्रियशन्स नेपाल धकाः नं पलाः न्ह्याकाच्वंगु खः । थ्वहे क्रियशन्सया लुखाँ संसार्स अनलाइनटिभि नांयागु छगू युट्युब च्यानल नं न्ह्याका वयाच्वंगु खः । नेपालभाषाया गीत संगीतख्यःयात जक मखसे देशया सांस्कृतिक व सामाजिक पर्व व गतिविधि नं गबलें लाइभ गबलें रेकर्डेड क्यना वयाच्वंगु खः । उलिजक मखुसे थ्व युट्युब च्यानलय् क्यनाः दुहांवःगु दां सम्बन्धित सर्जकयात तत्काल हे लःल्हायेगु ज्या नं याना वयाच्वंगु खः । थ्व छगू च्वछायेबहगु खँ खः । थजाःगु च्वछायेबहःगु ज्वःमदुुगु आपालं ज्या याना वयाच्वंम्ह खः स्वतन्त्र संसार महर्जन ।
स्वतन्त्रयाके तःताजि प्रतिभा दु । तर छु नं तालिम वा अध्ययनं सयेकूगु मखु । थःगु जीवनय् थः अबु तेजबहादुर महर्जन छम्ह बाहेक मेम्ह गुरु मदु धकाः धाइम्ह स्वतन्त्रं टेलिभिजनय् वइगु गीतान्जली, प्रतिभाको दबली थेंज्याःगु आपालं प्रोग्राम स्वयाः कलाया ज्ञां लानाकाःगु खःसा लिपा वनाः थः स्वयम् नं अज्याःगु ज्याझ्वःया निर्णायक तकं जुल । इमेज च्यानलय् वइगु ‘प्रतिभा दबू’ छगू अज्याःगु हे ज्याझ्वः खः । गुकि स्वतन्त्रं छम्ह निर्णायक जूगु खः । ‘जि गुरु जुइ नं गुबलें चेला जुइ मनं’ धकाः धाइम्ह स्वतन्त्रया मू लजगाः धइगु ग्राफिक्स डिजायन व प्रिन्टिङ्ग खः । वयागु हे प्रिन्टिङ्ग प्रेसय् ‘तोरी लाहुरे’ नांयागु कलिउड फिल्मया टि–शर्टत छापे याःगु खःसा थौंकन्हय् नेवाः मनोञ्जनया ख्यलय् जुइगु आपालं ज्याझ्वःया प्रचार हलंज्वलं डिजायन नं स्वतन्त्रं हे याना वयाच्वंगु दु । थःगु लजगाः बाहेक वयागु नुगः लिपांगु इलय् सामाजिक सेवाय् नं क्वसानाच्वंगु खः । स्वतन्त्रं थःगु बुदिं आदर्श सौल उच्च माध्यमिक विद्यालय, अपाङ्ग सेवा संघ खोनाया असक्त मस्तय् दथुइ हनेगु याना वयाच्वंगु खःसाः इमिगु निंतिं नं ग्वाहालि जुइ कथं थःगु संकिपाया च्यारिटी शोतक यायेधुंकूगु दु । मनय् सेवा भावया स्वां ह्वल कि व झन् झन् तफ्वः जुयावनी धइगु खँ स्वतन्त्रं पुष्टि याःगु दु । छाय्धाःसां स्वतन्त्र सानेपाया मेघा हस्पिटलया प्रमोटिङ्ग मेनेजर जुयाः नं ज्या यानाच्वंम्ह खः । व नं लजगाः कथं मखु, सेवा भावं यानाच्वंगु खः ।
विशेष याना नेपालभाषाया सांगितिक व मनोरञ्जनात्मक ज्याझ्वःया ग्वसाः ग्वयेगुली नुगः क्वसायेका वयाच्वंम्ह स्वतन्त्र संसार महर्जनं दँय्दसं मोहनिया लसताय् सांगितिक ज्याझ्वः याइगु खः । संसारय् दकलय् अप्वः विधाय् सिरपा बिउगु अवार्ड कथं ‘संसार नेशनल म्युजिक अवार्ड’ ग्वसाः ग्वःया नेपाःया नां गिनिज बुक अफ वल्र्ड रेकर्डय् दुथ्याकेगु कुतः यानाच्वंम्ह खः । नेवाः कलाकःमिपिंत हनेगु ज्या नं न्ह्याकूगु दु । थुकथं कलाकारिता ख्यलय् सकृय रुपं पलाः न्ह्याका वयाच्वंम्ह स्वतन्त्र संसार महर्जन थ्व ख्यःया छम्ह ज्वःमदुम्ह व्यक्तित्व खः धकाः धायेमा । स्वतन्त्रया निधनं नेपालभाषाया गीतसंगीत, संकिपा व मनोरन्जन ख्यलय् अवुरणीय क्षति जूवंगु धकाः धायेमा ।
