गुरुङ व मगर भाषाययात गण्डकी प्रदेशय् सरकारं मान्यता बिल
लहनान्युज | गुंलाथ्व पंचमी ११४५, सावन १३ मंगलवाः
नेपाः बहुजातीय, बहुभाषिक व बहुसांस्कृतिक देय् धकाः संविधानय् धयातःगु दुसां ब्यवहारय् छ्यलेगु ज्या जुयाच्वंगु मदु । भाषायात कया स्वयेगु खःसा खस नेपालीयात राष्ट्रिय भाषा व मेमेगु भाषायात राष्ट्र भाषा धकाः धायेगु याः। दच्छि न्ह्यः बागमती प्रदेश सरकारं नेपालभाषा व तामाङ्ग भाषायात कामकाजी भाषायात मान्यता बिया नेपाः बहुजातीय व बहुभाषिक देय् खः धइगु मान्यता बिउगु कथं कायेमाः। तर अय्नं ब्यवहारय् भचा समस्या वःगु खने दयाच्वंगु दु।
अथे हे छु दिं न्ह्यः गण्डकी प्रदेश न गुरुङ व मगर भाषायात सरकारी कामकाजया भाषाया रुपय् मान्यता ब्यूगु दु। थुकिया अन्तर्निहित अर्थ राज्यं बहुजातीय, बहुभाषिक व बहुसांस्कृतिकताया मू विशेषतायात आत्मसात याःगु दु। गण्डकी प्रदेशया थुगु पलाःया कारणं मेमेगु प्रदेशयात नं थःगु बहुसंख्यक भाषायात कामकाजी भाषाया रुपय् मान्यता बीत प्रेरित याइ। वास्तवय् प्रादेशिक सरकारं यायेफुगु थ्व ज्या नेपाःया बहुभाषिक समाजयात सम्मान यायेगु व भाषिक विविधतायात संरक्षण यायेगु दिशाय् छगू ऐतिहासिक ईल्वहँ जूगु दु। थुगु ज्यां प्रादेशिक सरकारपाखें भाषा संरक्षण व प्रवद्र्धनया नितिं ग्यसूलागु पलाः जुइफुगु भलसा कायेफइ।
नेपाःया संविधान विशेष यानाः धारा ७ या दफा (२) व (३) य् प्रदेश दुनेया बहुसंख्यक जनतां ल्हाइगु भाय्यात सरकारी कामकाजया भाय् कथं क्वःछी फइगु व्यवस्था यानातःगु दु। थुगु प्रावधानं संविधानया समानता व समावेशीताया उद्देश्य साकार यायेत स्पष्ट रुपं मार्गदर्शन याइ। गण्डकी प्रदेशं थुगु प्रावधान कार्यान्वयन यासें गुरुङ व मगर भाषायात सरकारी कामकाजया भाषा दयेकेगु निर्णय याःगु दु। थ्व निर्णयलिसें सम्बन्धित विधेयकं गुरुङ व मगर भाषां सरकारी ज्या, नागरिक सूचना, राजपत्र प्रकाशन लगायत सार्वजनिक दस्तावेज व्यवस्थापन यायेगु व्यवस्था हःगु दु। थुकिया नापं भाषा आयोग व प्रादेशिक सरकारं मंकाः कथं भाषाया अध्ययन, अनुसन्धान व मानकीकरणया निंतिं ज्याझ्वः न्ह्याकीगु जूगु दु। आः गुरुङ व मगर भाषा गण्डकीय् प्रदेशय् सांस्कृतिक सम्पत्तिइ जक सीमित मजूसे सरकारी कामकाजया भाषाया कथं छ्यलाबुलाय् वःगु गर्वया विषय जुयाच्वंगु दु।
राज्यस्तरं भाषायात छ्यलेबलय् न्हूगु उचाइ काइ। वास्तवय् मातृभाषाया शिक्षा व सरकारी सेवाया प्रवाहं जनताया आत्मसम्मान व सांस्कृतिक पहिचानयात क्वातुकी। राष्ट्रियताया प्रवद्र्धनया निंतिं नं तसकं महत्वपूर्ण जू।
अथेहे येँ महानगरपालिकाया तत्कालिन मेयर विद्यासुन्दर शाक्य न येँ महानगरय् स्थानीय भाषा मान्यता बिइगु कथं नेपालभाषायात पाठ्यक्रमय् दुथ्याकेगु निर्णय जूगु खः। येँ महानगर दुने ब्बनेकुथिइ च्यागू तगिं तक अनिवार्य नेपालभाषां पाठ्यक्रमय् ब्बकेगु निर्णय यायेवं मेमेगु पालिकाय् न ब्बंकेगु सुरु जूगु छगू बालागु ज्या जूगु दु।
