प्रधानमन्त्री केपी शर्मा ओलीं दँय् दसं साउन १५ य् फुक्क नेपाःमितय्सं लय्तायाः खीर नयेगु वातावरण निर्माण यायेमाःगु धयादीगु दु।

नेकपा (एमाले)या साहित्य, कला नापं संस्कृति विभागं थौं ग्वसाःग्वःगु स्रष्टा भेटघाट नापं खीर नयेगु ज्याझ्वलय् प्रधानमन्त्री ओलीं सकल नेपाःमितय्सं थ्व न्हुकुन्हु लय्तायाः खीर नयेगु वातावरण निर्माण यायेत सकलसित इनाप यानादिल।

वय्कलं थुगुसी तराई–मधेसय् सुक्खा जूगुलिं बांलाक बुँज्या मजुइगु परिस्थिति सिर्जना जूगु न्ह्यथनादिसें देय्या अन्नभण्डार कथं दूगु तराई–मधेसय् सिँचाइया पाय्छिगु प्रबन्ध यायेत सरकार लगे जुयाच्वंनागु दु धका धयादिल।

प्रधानमन्त्री ओलीं सुनकोसी मरिन डाइभर्सन, रानी जमरा कुलरिया, तमोरलिसेंया आयोजना याकनं पूवंकेत सम्बन्धित निकाययात निर्देशन बिइ धुंकूगु जानकारी नं बियादिल।

विभागया प्रमुख नापं शिक्षा, विज्ञान व प्रविधिमन्त्री रघुजी पन्तं नेपाःया मौलिक संस्कृतिया जगेर्ना यायेत दँय्द सं ‘खीर नयेगु’ ज्याझ्वः ग्वसाः ग्वया वयाच्वंगु धयादिल।

Categorized in राष्ट्रिय