निर्वाचन आयोगं आः वइगु कार्तिक १७ गते रुपन्देही निर्वाचन क्षेत्र नं ३ य् जुइगु उपनिर्वाचनया निंतिं दल दर्ता यायेत सकल राजनीतिक दलयात आह्वान याःगु दु।

आयोगं छगू सुचं पिथंनाः थ्व हे साउन २१ निसें २७ गते तक आयोगया केन्द्रीय ज्याकुथिइ दल दर्ताया निंतिं निवेदन बिइ फइगु धाःगु खः। आयोगं थ्व स्वया न्ह्यः उपनिर्वाचनया निंतिं निर्वाचन ज्या धलः स्वीकृत याये धुंकूगु दु।

आः वइगु असोज २१ गते सुथसिया १० ताः ई निसें ५ ताः ई तक निर्वाचन अधिकृतया ज्याकुथिइ उम्मेदवारया मनोनयन दर्ता जुइगु व वहे दिंया सनिलय् उम्मेदवारया धलः पिथनीइ। असोज २४ गते उम्मेदवारया लिपांगु नामावली पिथनीइ।

कार्तिक १७ गते सुथसिया ७ ताः ई निसें सनिलया ५ ताः ई तक मतदान केन्द्रय् मतदान जुइगु जुइ।

प्रतिनिधि सभाया दुजः लिसें प्रदेश सभा दुजः निर्वाचन, २०७९ या समानुपातिक निर्वाचन प्रणालीपाखे बन्द धलखय् नां दुथ्यापिंसं उम्मेदवारी बिइ मफइगु आयोगं धाःगु दु।

Categorized in राष्ट्रिय