सशस्त्र प्रहरी बल नेपालं उज्वेकिस्तानया कर्सी सहरय् जुइगु एएफसी ओमन्स क्लब च्याम्पिएन्स २०२५–२०२६ य् ब्वति कायेत वनेत्यंपिं नेपाल एपीएफ क्लबया फुटबल कासामि, प्रशिक्षक व अधिकारीतय्त बिदाइ ब्यूगु दु।

सशस्त्र प्रहरी बल नेपाल प्रधान ज्याकुथि हलचोकय् छगू समारोह दथुइ सशस्त्र प्रहरीया महानिरीक्षक राजु अर्यालं एसियन फुटबल कन्फेरेडेसनया ग्वसालय् थ्व हे भदौ ९ निसें १५ गते (अगस्ट २५ निसें ३१) तक जुइगु उगु कासाय् ब्वति कायेत कासामिलिसें प्रतिनिधितय्त बिदाइ बियादिल।

महानिरीक्षक अर्यालं त्याके धकाः कासा म्हितेत इनाप यानादिल। वय्कलं कासा सङ्गठनया जक मखुसे देय्या हे गौरवया खँ जूगुलिं कासामितय्सं अनुशासित जुयाः म्हितेमाःगु नापं थुकियात महत्वपूर्ण ह्वःताः कथं कायेमाःगु धापू तयादिल।उगु झ्वलय् महानिरीक्षक अर्यालं अग्नि इनकर्पोरेट प्रालिया प्रबन्धक निर्देशक अर्जुनप्रसाद शर्मायात आइजी एपीएफ कमेण्डेसनपाखें हनादिल। एन्फा नायः पङ्कज विक्रम नेम्वाङं कासामितय्त त्यायेमा धकाः भिंतुना बियादिल।

उगु झ्वलय् सशस्त्र प्रहरी अतिरिक्त महानिरीक्षक वंशीराज दाहाल, सशस्त्र प्रहरी नायब महानिरीक्षक कालिदास धौवजी, सशस्त्र प्रहरी बल नेपाल खेलकुद नापं शारीरिक सुगठन शिक्षालय येँया समादेशक सशस्त्र प्रहरी वरिष्ठ उपरीक्षक याःगु न ब्बति दुगु खः।

Categorized in कासा