धादिङया धार्के सतकय् नेवाः राष्ट्रिय परिषदया नेतृत्वय् स्थानीयतय्सं तारबार तःगु दु। निजी जग्गा मिचे याना मापदण्ड अःखः सतकय् पिच याःगु धासे उमिसं तारबार तःगु खः।

नेवाः राष्ट्रिय परिषदया अध्यक्ष सुमन सायमी जानकारी बिउगु कथं धुनिबेसी नगरपालिका–५ य् बिमला महर्जनया ३ रोपनी १५ आना २ पैसा जग्गाय् मापदण्ड अःखः पिच यागु धासे महर्जनयात न्याय बिइगु निति तारबार तयागु खः धका धाःगु दु।

सायमीं धाःगु दु, ‘बिमला महर्जनया जग्गा मापदण्ड कथं लँ बिइमागु जग्गा बाहेक ल्यः दनिइगु बुँ लित बिइगु निति सतकय् तारबार तयागु खः।’

तारबार तयेगु निति परिषदया संयोजक सुमन सायमी, हलिं नेवाः गुठीया संस्थापक शान्त प्रकाश श्रेष्ठ, बिनोद महर्जन, राष्ट्रिय मुक्ति पार्टी नेपालया उपाध्यक्ष कौशल कुमार सिंह, प्रवक्ता रबिन्द्र कुमार श्रेष्ठ, विकासबाबु श्रेष्ठ, विकास घिमिरे, बेबी राजभण्डारीपिनिगु ब्बति दुगु खः।

Categorized in राष्ट्रिय