नेपाल कम्युनिष्ट पार्टी (एमाले)या झिंछक्वःगु महाधिवेशनया तयारीया निंतिं एमालेया केन्द्रीय सचिवालयया बैठक थ्वहे कात्तिक १५ गते शनिबाः च्वनेत्यंगु दु। बैठकं महाधिवेशनलिसे सम्बन्धित थीथी निर्णय याइगु जूगु दु। वंगु असोज २९ निसें ३१ गतेतक जूगु एमालेया झिक्वःगु केन्द्रीय कमिटी बैठकं झिंछक्वःगु महाधिवेशन आः वइगु मंसिर २७ निसें २९ गतेतक पोखराय् यायेगु निर्णय याःगु खः।

पार्टी केन्द्रीय ज्याकुथिया सचिव डा भीष्म अधिकारीया कथं सचिवालय बैठकपाखें महाधिवेशनयात कयाः थीथी निर्णय याइगु तयारी जूगु दु। उगु बैठकं महाधिवेशन प्रतिनिधि ल्ययेगु व विधि महाधिवेशन सम्पन्न यायेत थीथी उपसमिति नीस्वनेत्यंगु, स्थानीय ग्वसाः खलःनाप समन्वयलिसेंया विषयय् निर्णय याइगु धाःगु दु।

उगु बैठकं महाधिवेशन तयारीया पूवंकं धलः सार्वजनिक यायेत्यंगु दु । बैठकं महधिवेशनया लोगो व नाराया विषयय् नापं सहलह यायेत्यंगु दु।

Categorized in राजनीति