बागमती प्रदेश सरकारं मन्त्रालयया ल्याः क्वपालेगु तयारी याःगु दु। खर्च म्हो यायेगु व आर्थिक मितव्ययी जुइगु निर्णय याःगु प्रदेश सरकारं आः दूगु प्रदेश मन्त्रालयया ल्याः १४ गूलिं न्हय्गू यायेगु तयारी न्ह्याकूगु दु।

प्रमुख प्रतिपक्ष दल नेपाल कम्युनिष्ट पार्टी (माओवादी केन्द्रं) प्रदेश सरकारयात मन्त्रालयया ल्या क्वपालेत माग यानाः छुं दिं न्ह्यः ज्ञापन पौ लःल्हाःगु खः। प्रमुख प्रतिपक्षी दलया ज्ञापन लिपा छुं दिं न्ह्यः च्वंगु सत्तारुढ दल नेपाली कांग्रेस व नेपाल कम्युनिष्ट पार्टी (एमाले) संसदीय दलया मंकाः बैठकं प्रदेश सरकारया मन्त्रालय क्वपालेगु विषयय् सहमति जुइ धुंकाः सरकार मन्त्रालयया ल्या म्हो यायेगु गृहकार्यय् न्ह्यच्यूगु खः।

“सत्तारुढ दलया मंकाः बैठकय् मन्त्रालयया ल्याः क्वपालेगु सैद्धान्तिक सहमति जुइधुंकाः सरकारं छगू समिति हे दयेकाः थ्व विषयय् अध्ययन न्ह्याके धुंकूगु दु”, मुख्यमन्त्री इन्द्रबहादुर बानियाँं धयादिल, “मन्त्रालयया ल्या गुलि यायेगु? छु छु मन्त्रालय तयेगु ? छु छु मन्त्रालययात समायोजन यायेगु, कर्मचारी व्यवस्थापन गथे यानाः यायेगु लिसेंया विषयय् समितिं अध्ययन यानाच्वंगु दु ।” प्रदेश सरकारया मन्त्रालयत क्वपालेगु विषयय् दलत सहमत दूगुलिं मन्त्रालयया ल्याः क्वपालेगु विषयय् ठोस निर्णयय् वनेगु निंतिं जिमिसं प्रक्रिया न्ह्याकेधुंकूगु मुख्यमन्त्री बानियाया धापू दु।

खर्च म्हो यायेगु व सुशासन प्रदेश सरकारया प्रमुख प्राथमिकताय् लानाच्वंगुलिं मन्त्रालय व संरचनाया विषयय् दलपिंनाप सहलह यानाः मंकाः बिचाः निर्माण यानाः थुकियात तार्किक निष्कर्षय् थ्यंकेगु मुख्यमन्त्री बानियाँं धयादिल। “आःया परिस्थिति हिलावंगु दु, जिपिं मन्त्रालयया ल्याः क्वपालेगु धकाः जक मखु, गथे यानाः व्यवस्थापन यायेगु धयागुलिइ नापं केन्द्रित जुयाच्वनाःगु दु”, मुख्यमन्त्री बानियाँं धयादिल, “न्हापांगु चरणय् दलीय सहमति यायेगु व उकिया लिपा विज्ञपिनिगु छ्याताः कथं मन्त्रालयया ल्याः क्वपालेगु व व्यवस्थापन यायेगु लिच्वःकय् थ्यंकेगु जुइ”, मन्त्रालयया ल्याः क्वपालेगु विषय विशुद्ध प्रशासनिक सुधार व वित्तीय अनुशासन नाप स्वाःगु विषय जूगुलिं दलीय सहमतिइ हे लिच्वः थ्यंकेगु मुख्यमन्त्री बानियाँं धयादिल।

Categorized in राष्ट्रिय