केन्द्रीय अनुसन्धान ब्यूरों रेमिट कारोबार यायेगु झ्वलय् प्रभु बैंकयात छगू अर्बसिबें अप्वो द्यापं जुइकूगु द्वपनय् बैंकया विप्रेषण विभाग प्रमुख सुजिन शाक्ययात ज्वंगु दु।

ब्यूरोया पुचलं उच्च अदालत पाटनपाखें पक्राउ अनुमति कयाः म्हिगः यल महानगरपालिका–११ ईखाछेँपाखें शाक्ययात ज्वंगु खः। शाक्यं रेमिट कारोबार यानाः प्रभु बैंकयात द्यापं व थःगु स्वार्थ समूह अन्तर्गतया प्रभु मनी ट्रान्सफरयात लबः जुइगु कथं बैंकिङ कारोबार याःगु ब्यूरोया द्वपं दु।

रेमिटबापटया ‘प्रिफण्डिङ’ याये फइगु कानुनी व्यवस्थाया दुरुपयोग यानाः याकाः उकिया नामय् नियम अःखः अर्बाैं तका बियाः उकिया निंतिं नियम कथं ब्याज नापं मकासें बैंकयात छगू अर्ब तका सिबें अप्वः ध्यबा द्यापं जुइकूगु प्रारम्भिक अनुसन्धानया झ्वलय् खनेदूगु धाःगु दु। ब्यूरों नियम अःखः ‘सुपर एजेन्ट’ दयेकाः रेमिटन्स कारोबार यायेत प्रभु म्यानेजमेन्ट प्रालियात एड्भान्स ध्यबा बिया उगु कम्पनीलिसे रेमिट कारोबार मजुइ धुंकूसां नापं स्वार्थ समूहयात उगु ध्यबा छ्यले ब्यूगु द्वपंनय् थ्व सिबें न्ह्यः बैंकया प्रमुख कार्यकारी अधिकृत अशोक शेरचन लिसेंया उच्च पदस्थ कर्मचारीयात नियन्त्रणय् तयाः अनुसन्धान यानाच्वंगु दु।

Categorized in अपराध