बरिष्ठ कलाकारलिसें च्वमि नाप निर्देशक पवन जोशीया च्वसां पिज्वःगु १ सय १८ पु धलखय् लाःगु म्ये ‘रक्तदान जीवनदान’ जागरण म्येया रिकर्डिङ ज्या क्वचाःगु दु।

थुगु म्ये पुलिस क्लबय् च्वंगु अन्नपूर्ण रेकर्ड स्टुडियोस रिकर्ड जूगु खःसा थुगु म्येया रिकर्डिङ, मिक्सिङ व माष्टरिङया ज्या विजय मास्कीं यानादीगु खः।थुगु जागरण म्ये ‘रक्तदान जीवनदान’ म्येया लय् चिनामिलिसें संगीत संयोजक अनिल तुलाधर खःसा थुगु म्येय् राजु सिखाकार व समा डंगोलं सः बियातःगु दु।

ब्लोदानया विनोद तुलाधरया संयोजकत्वय् रिकर्ड जूगु थुगु जागरण म्ये ‘रक्तदान जीवनदान’ याकनं हे म्यूजिक भिडियो निर्माण यानाः पिथनीगु जूगु दु।जागरण म्ये ‘रक्तदान जीवनदान’या म्येच्वमि पवन जोशीं ज्ञान–सिप व संस्कार धार्मिक सफू दुने जक दइ, छुं नं साहित्ययात ध्यान बियाः अध्ययन यायेफत धाःसा शिक्षा, संस्कार व मानवीय कर्मया आभाष जुइ, समाजप्रतिया जिम्मेवार दायित्व वहन याइ, थ्वहे मानवीय धर्म खः धैगु अभिव्यक्त यायेत ताःलाःगु म्ये खः ‘रक्तदान जीवनदान’ धकाः धयादीगु दु।

म्येच्वमि जोशीं धयादीगु दु, “जन्म जुइ धुंकाः मृत्यु कःघायेगु प्राकृतिक नियम खः, तर म्वायेगु ई दुपिन्त म्वाकेगु सपुतया कर्म खः। थ्वहे सन्देश जागरण म्ये रक्तदान जीवनदान दुने दु।

Categorized in मनोरन्जन