स्वक्वःगु विश्व नेवाः सम्मेलन नेपालय् जुइगु
लहनान्युज | सिल्लागा एकादशी ११३९ (माच २ २०१९)
हलिं नेवाः दबूया स्वक्वःगु सम्मेलन थ्व हे वइगु चिल्लागा अष्टमीनिसें दशमी अर्थात चैत्र १४ गतेनिसें १६ गते तक येँय् तःजिक याइगु जूगु दु ।
थौं शनिवाः नेवाः पत्रकार राष्टिय दबूया संयोजनय् स्वक्वःगु हलिं नेवाः दबू तःमुँज्या ग्वसाः खलःया ग्वसालय् जूगु पत्रकार सम्मेलनय् उगु कथंया जानकारी बिउगु दु । थुगुसी जइगु हलिं नेवाः दबूया स्वक्वःगु तःमुँज्याय् झिंगुलिं मल्याक मुलकपाखें सच्छिम्हं मल्याक प्रतिनिधितय्सं ब्वति कयादी धकाः ग्वसाः खलःया कजि पुस्करभक्त माथेमां कनादीगु दु ।
स्वन्हु तक जुइगु थुगु सम्मेलनया झ्वलय् नेपाःया थीथी जिल्लायापिं याा न्यासःम्ह नेवाःतय्सं ब्वति कयादीगु, नेपाःया जक मखु हलिं न्यकंया नेवाःतय्गु सवालयात कया सहलह ब्याकेगु, स्वदँया नितिं न्हूगु नेतृत्व ल्ययेगु नापं नेवाः सभ्यतायात न्ह्यब्वइगु कथंया थीथी ज्याझ्वः यायेगु जानकारी बियादीगु खः ।
हलिं नेवाः दबू नेपाः देय् मू कवःया कार्यबहाक नायः शाक्य सुरेनया नायोसुइ जूगु उगु ज्याझ्वलय् ग्वसाःखलःया ल्यूकजिपिं रश्मिला प्रजापति व सुरेन्द्रभक्त श्रेष्ठ, नेवाः पत्रकार राष्टिय दबूया नायो श्रीकृष्ण महर्जन, रत्नकाजि लूनिभाःपिन्सं विश्व नेवाः सम्मेलनया बारे जानकारी बियादीगु खः ।
थीथी संचार माध्यमया पत्रकारपिं सहभागी जुयादीगु उगु पत्रकार सम्मेलन ज्याझ्वः सुदय शिलाकारं संचालन यानादीगु खः ।
