सु–कि जिगु मिखाय्, जिगु मनय्
विजय सैजु | चौलाथ्व षष्ठी ११४६, चैत्र १० मंगलवाः
वाःपौ जनआस्था नापंया स्वापू
सुकिया अतिकं सतिम्ह पत्रकार पासा जनआस्थाया सम्पादक किशोर श्रेष्ठ, अले वाःपौया नियमित स्तम्भकार । सुकिया व्यंग्य लेख ‘शहर भित्र’ ‘सिंहराज’ जिं न्ह्याबलें स्वयेगु याना । जनआस्थाया संस्थापक दुजः मध्ये जि नं छम्ह खः । जनआस्थाया शहर भित्रया व्यंग्य लेख छक्वःनिक्वः मिस जुइबलय् पत्रिका लल्लो महसुस जुइ । जनआस्थाया समाचार स्वये न्ह्यः हे न्हापां जिं वहे सुकिया ‘शहरभित्र’ व ‘सिहंराज’ न्हापां स्वयेगु बानी । जि नं तत्काल हे छक्व निक्वः फिडब्याक बीगु याना, बांलाःगु व्यंग्य लेखयात न्ह्याबलें फोना यानाः हे सुभाय बीगु जिगु चलन । आः जनआस्थाय् थ्व सिंहराज कोलम खालि जुइगु जुइ । थथे धइगु जनआस्था हे छं ईया निंतिं सकल पाठकपिंत खल्लो महसुस जुइगु जुल । छु याये सुकि मन्त वय्कःया रचनाया नं देहावसान जुल ।
सु–कि जिगु मिखाय्, जिगु मनय्
सुरेश किरण मानन्धर अर्थात सुकि पत्याः हे मजुइ कथं झीत त्वःता अस्त जुल । सुरेशयात हर्ट अट्याक जूगु कन्हय् कुन्हु सुथय् शैलेश शाक्य लगंबरेया फेसबुकय् बुखं वःगु खः । ‘गेटवेल सुन’ धकाः स्टाय्टस च्वयाबिया । जिं ला माइनर स्ट्रोक जूगु जुइ धकाः च्वनागु, मेजर स्ट्रोक जूगु जुयाच्वन, रिकभर मजुल, पत्याः मजुइक सुकि मन्त । जगु दकलय् न्हापां वय्कःयात श्रद्धाञ्जली ।
जितः लुमं करिब छगू दशक ति न्ह्यः जिकेच्वंगु मोबाइल (नोकिया) जिगु देपाय् च्वंगु लँया म्हिचाय् घानाः नेपालभाषा टाइम्सया ज्याकुथी वनागु । च्वसु छगू प्रकाशन यायेत । अबलय् जिगु देपाय् हिताय् च्वंगु मोबाइल खंकाः लेफ्ट साइटया खल्तीइ मोबाइल तयेमजिउ धाइ, नुगःचु दुथाय् इफेक्ट यायेयः धाइ । ख नं खः नुगःचु देपाय् तयेमजिउ मोबाइल । थ्व खँ जितः आः वयाः रिकल जुल, सायद अबलय् वयाके नुगःचुया समस्या दु ला धयाथें ताल । जिं ला बिचाः मयानागु सुकिया सतिपिं पासापिं नां खँ जुइ बलय् वय्कःया नुगःचुया छु कथंया समस्या दु ला धैथें जित बिचाः वः । तर थथे बिचाः हे मयाना कथं हाइ लेबलया स्ट्रोक जुइगु सोच हे मदु कथं दुर्घटना जुल । सुकि सुस्त जुयाबिल ।
सुकि विश्वभूमि न्हिपौ नाप स्वापू
विश्वभूमिया सम्पादक मदुम्ह अशोक श्रेष्ठजुया अतिकं यम्ह ग्वाहालिमी सुरेश किरण खः । विश्वभूमिया जि नियमित पाठक जक मखु नियमित स्तम्भकार नं खः । विश्वभूमिइ च्वसु बीबलय् ग्रामेटिकल करेक्सन यानाः छापे यानाबी । सुकि उलि हे मिहेनतीम्ह पत्रकार । विश्वभूमि लिपा पिदंगु ‘सन्ध्या टाइम्स’या मू सम्पादक जूबलय् नं जिं न्ह्याबलें मदिक्क च्वसु बीगु याना । लिपा ‘नेपालभाषा टाइम्स’ पिदन, जिगु स्वापू न्हापा गथे खः अथे हे नियमित पाठक नियमित स्तम्भकार खः । थाय्मदुइ ज्याकुथी न्ह्याबलें नियमित नापलायेगु ज्या जू । वय्कः नापं पारिवारिक ज्याखँया बारे नं सहलह उतिकं जू ।
भाषा आयोगया दुजः जुइधुंकाः
सुकिनापया नियमित स्वापू वय्कः भाषा आयोगया माननीय दुजः जुइधुंकाः नापलायेगु भचा तापात । वय्कःया थीथी कथंया ज्याया भालां खः ला मसिउ नापलाये थाकुया वन । जिं सिउ कथं सुकिया छगू कमजोरी सुनां नं वय्कःयाके लेख रचना सम्बन्धी ग्वाहालिा फ्वन धाःसा वय्कःयाके म्हाः लिमला धायेगु चलन हे मदु । वय्कलं चछि न्हिछि मधाःसो हेथःगु साहित्यिक ज्याय् तल्लीन जुयाच्वनी । जिं स्वये आपाः हे जिम्मेवारी कयाः जूगलिं नं थथे बामलाक्क हार्ट स्ट्रोक जूगु मखुला । नत्र छक्वलं थथे मजुइमाःगु ।
सुकि नापया कलकत्ता ट्रिप
अरविन्द्र केजरीवाल नापंया छगू ज्याझ्वलय् कलकत्ताय् वातावरण सम्बन्धी ज्याझ्वलय् कन्सर्न नेपालयात ब्वनापौ वल । ‘सुचनाया हक’ या अभियन्ता केजरीवाल अबलय् चर्चा दुगु खः । उकिं वय्कः नाप स्वापू तयेगु बिचाः नं जिं ब्वति कायेगु बिचाः थें सुकियात नं वने न्ह्याःला धया । वय्कलं जि नं वये धाल । उघ्रिमय जिं इन्डियन एयरलाइन्सया निगू टिकट बुक याना । वनाः सहभागी जुया । थीथी थीथी गेस्ट हाउस होटेलय् निम्ह नापं सहलह यायेगु गुगु मौका चूलात व अविस्मरणीय खः । ज्ञानगुनं विलक्षणं जाम्ह सुरेश¬या खँ न्यनाः जि ला छक्क ।
अरविन्द केजरीवाल नापं दुगु कन्फरेन्स तःजिगु होटलय् जूगु खः । स्वन्हुयंकंया उगु ज्याझ्वलय् थीथी मानव अधिकार संघसंस्थां ब्वति काःगु खः । करिब ४० म्ह ति उपस्थित जूगु उगु ज्याझ्वलय् मू वक्ता केजरीवाला हे खः । वय्कःया वातावण सम्बन्धी राइट टु इन्फरमेसन बारे स्पीच धुंकाः सुकि व जि नं नेपाः नापा स्वाकाः न्ह्यसः तयेगु ज्या जूगु खः । सहलह तसकं बांलाः पिला केजरीवाल नाप टि–ब्रेकय् सम्पर्क आदान प्रदान नं यानागु खः । मू खँ अलबय् वय्कः (केजरीवाला) धापू नं अधिकार कायेगु निंतिं राजनीतिक अधिकार माः उकिया निंतिं पार्टी हे चायेकेगु धापू कथं वय्कः दिल्ली लिहां झायाः आम आदमि पार्टी चायेकलसा नेपाः वयाः सुकि नापया सहलह कथं नेपाः पार्टी जि ब्वांय् जुया । थ्व ज्यायात तिबः बी कथं सुरेशं नेपाःतय् बिस्कं पार्टी माः कि म्वाः धयागु कन्सेप्ट तयार यानाः अवधारणा पौ पपित बीगु ज्या जुल । उकिं नेपाः राष्ट्रिय पार्टी स्वनेगुलिइ वय्कःया नं अबलय् योगदान दुगुखँ थन लुमंकाच्वना । पहिचान सहितया संघीयता वय्कःया नं म्हगस खः ।
ज्वः मदुम्ह साहित्यकार सुकिया सालिनता खः ।
मदुम्ह सुरेश किरणया छगू ज्वः मदुगु बानि धैगु वय्कःया शालीन चरित्र खः । जिं स्वये वय्कःया शत्रु धइपिं हे मदु । वय्कःया बैरभाव तंपिंत वय्कलं साहित्यिक ग्यंग्य कथें हे शालीन खँग्वलं म्हुतुप्वा तिइक लिसः बी । बैरभाव तइपिं अथें शान्त जुइ । नेवाःतय्गु राजनीतिक समस्याया खँय् तःक्वःमछि हे सहलह जू वय्कः नाप । खास धायेमाल धाःसा वय्कःया हे सरसल्लाह कथं जिं जिमिसं नेपाः राष्ट्रिय पार्टीयात तत्काल नेकक (माओवादी केन्द्र) नाप एकीकरण यानागु खः । पहिचान सहितया संघीयताया पक्ष वय्कः न्ह्याबलें अडिग । थ्वहे पहिचानया मुद्दाया म्हगस पूवंकेगु निंतिं एकीकरणया कडा पलाः छिनागु खः । सुरेश किरणयात हानं छकः श्रद्धाञ्जली देछाना च्वना । सुभाय् ।
