चलचित्र पत्रकार सङ्घं संकिपा व कला–संस्कृतिया गतिविधियात राष्ट्रियस्तरय् पलिस्था यायेगु निंतिं थीथी प्रदेश लिसें जिल्ला शाखाय् अधिवेशन यानाः सङ्गठन तब्याका यंकूगु दु।

संकिपा उद्योगयात सञ्चार ख्यःपाखें ग्वाहालि यानाः वयाच्वंगु सङ्घंदेय्या थीथी झिंन्यागू जिल्ला कचा व विदेशय् च्यागू कचा तब्याकूगु केन्द्रीय नायः समिर बलामीं जानकारी बियादिल। वय्कःया कथं थःगु गतिविधि संकिपा पत्रकारिताय् जक लिकुंका मतसें कला, साहित्य, गीत–संगीत, रङ्गमञ्च, मनोरञ्जन व मेमेगु साङ्गीतिक ज्याझ्वलय् सक्रिय यायेगु निंतिं कचा तब्याकागु धयादिल। सङ्घं थःगु १० क्वःगु केन्द्रीय महाधिवेशन आः वइगु वैशाख ५ गते दुने यायेगु यानाः कचातय्गु अधिवेशन यानागु धाःगु दु।

सङ्घया कचा अधिवेशन पाखें सङ्घया कोशी प्रदेशय् नायःखय् वीरेन्द्र शाह लिसें कास्कीइ सन्तोष बस्याल, पर्साय् सूर्यनारायण विक, सुनसरीइ सुवास सङ्कल्प श्रेष्ठ, मकवानपुरय् कपिल खड्का व मोरङय् प्रेम देवान नायः पदय् निर्विरोध ल्यःगु दु।

अथे हे, चितवनय् गोविन्द अर्याल, इलामय् अतित योङहाङ, रूपन्देहीइ कृष्ण भण्डारी, कैलालीइ विवेक नगारी, झापाय् एकराज प्रधान, सुर्खेतय् रमेशकुमार पाण्डे, बाँकेय् रामचन्द्र पौडेल व दाङय् निरला अर्याल नायलय् ल्यःगु दु।

सङ्घं थःगु दुजःपिनि निंतिं दक्षता अभिवृद्धि ज्याझ्वः, अन्तरक्रिया, कार्यशाला, राष्ट्रिय भेला, पलिस्था दिवस, राष्ट्रिय कार्यशाला, कल्याणकारी कोष सञ्चालन, बिरामी दुजःयात ग्वाहालि बिइगु लिसेंया ज्या यानाः वयाच्वंगु दु ।

Categorized in मनोरन्जन