चारुमती महाविहारया ग्वसालय् विहिवाः अशोक अष्टमीया दिनय् सम्रात अशोकया २३३० क्वःगु जन्म जयन्ती तःजिक हंगु दु।

अशोकया म्ह्याय् चारुमतीया नामं दयेकूगु चाबहि दुने हे सम्रात अशोक, अशोकया म्ह्याय् चारुमती, चरुमतीया जहान देवपाल नापं चारुमती बहीया बारे तःजिक अन्तक्र्रिया ज्याझ्वः जुगु दु। बुद्ध धर्मयात हलिंन्यंकं प्रचार प्रसार यानादीम्ह चक्रवती सम्रात अशोकया योगदान नापं अशोकया जीवनीयात कया तकं ब्यापक चर्चा यायेगु ज्या जूगु खः।

पुलांपिं मन्त्रीपिं गोपाल किराँती, डा. केशवमान शाक्य, बौद्ध विद्धान धर्म शाक्य, अभियन्ता राजु शाक्य, पत्रकार श्रीकृष्ण महर्जन नेवाः, साहित्यकार रमेशजंग थापा, भिमानन्द ढुंगाना, डा. मिलनराज गर्तौला, सुकन्य अधिकारीपिन्सं थःथःगु नुगँ खः तयादीगु खः। भिक्षु तपस्सी धम्म महास्थविर व महाविहारया थायपाजु पूर्णवीर शाक्यया मंकाः सभाध्यक्षताय् उगु ज्याझ्वः जूगु खः।

चारुमती महाविहारया गुथियार परमाननन्द शाक्यं न्ह्याकादीगु उगु ज्याझ्वलय् थीथी ब्यक्तित्वपिन्सं थःथःगु बिचाः प्वंकादीगु खः। चारुमती महाविहारय् चारुमतीया मूर्ति पलिस्था यायेगु सवालय् विहारया गुथियारपिन्सं औपचारिक रुपं क्वछिनादी धुंकूगु दु। चारुमती महाविहारय् अशोक जन्मजन्ती हंगु थ्व स्वक्वःखुसि खः।

Categorized in राष्ट्रिय