लिपा विश्वभूमिइ कलह पिदना कुचाः दल। अले सुरेश – सुजीवया पुचलं ‘सन्ध्या टाइम्स’ नामं न्हिपौ पिथन। ढल्कोय् च्वंगु ज्याकुथिं व इलय् थीथी प्यंगू प्रकाशन पिदना च्वंगु खः। उकिमध्ये खस भाय्या प्रतिदिन न्हिपौ छगू खः । उगु न्हिपौया निंतिं समाचार छगू दयेका सुरेशयात बिया । समाचारया मूति व पृष्ठभूमि नं कनाः । गथे जुइ ? गुजाःगु लिच्वः वइ ? जिमि दथुइ छझाः मन्थन नं जुल । अन्ततः समाचार पिथनेगु धकाः वय्कल क्वछिना दिल । 

३०÷३२ दँया छम्ह ल्याय्म्ह । तइसे च्वना नं म्हः धिक तः धिकः । सँ नं कुलिकुलि चिं, स्मार्ट । वाकमैन घानाः जुइम्ह । व मनूया हुलिया । वीर हस्पिटल न्ह्यःने वासः पसःया पिनेसं मेचय् फेतुना च्वंम्ह इन्स्पेक्टरया न्ह्यःने दँ वन । सामान्य शिष्टाचार व उगु थुगु छुं भचाः खँ ल्हाना व मनू वना छ्वत । 

व वने धुँकाः इन्स्पेक्टरं थः प्रहरी जवानतय्त थुकथं न्वना धाल – स्वः पासापिं ! थ्व मनूयात म्हसिकी । थ्वं थःत विद्यार्थी नेता धयाजुइ । थ्व थुकथं हिरो जुया जुइम्ह । तराईलय् वनेबलय् वं गम्छा ब्वहलय् पाछाया जुइसा गबले गबले मुस्मांया भेषय् खःसां अजूचाये म्वाः। अले वं सामान्य जनतातय् न्ह्यःने कांग्रेस नेता गिरिजाप्रसाद कोइराला अथे हे शैलजा आचार्य नापं च्वनाच्वंगु् किपा क्यनाः मनूतय्त प्रभावित यायेत स्वयाच्वंगु छिमिसं खनी। थ्व थुकथं हे चाःचाः हिलाच्वंनी । थ्व छम्ह अजीबम्ह प्राणी खः । छिमिसं बांलाक म्हसिका ति। 

वासः पसः न्ह्यःने दना च्वनाम्ह जिं थुपिं फुक्क फुक्क लू स्वयाच्वना । खँल्हाबल्हा नं पूवंक हे न्यना । मनय् खुलदुली थुलि जुलकि थुकियात समाचारय् हीकेदुसा ज्यू धकाः मती वायेका च्वना । थः निनिया तुति मर्के जुयाः क्यनेत हस्पिटल थ्यंम्ह खः जि ।

समाचार पिदनां छवाः ति लिपा वं ल्याय्म्हम्ह मनू प्रतिदिनया व हे अंक ज्वनाः ढल्कोया ज्याकुथिइ थ्वन । वं समाचार सुना च्वंगु खः नां कनेत सम्पादक सुरेशयात तःक्वः मछि हे आग्रह यात । छापे जूगु खँ गलत खःसा संशोधन याना पिकया बिइ धकाः सम्पादकं जवाः बिल । खँ फुक्क पाय्छि हे खः । संशोधनया जरुरत मदु । जिगु बारे थुलिमछि स्यूम्ह सु लात थें ? सिके मास्ते वल धकाः धाःसां छितः खास हे ज्या वइम्ह मनू मखु धैगू लिसः बिया लितछ्वया धकाः सुरेशं लिपा थ्व खँ जि नाप ब्याकल । समाचार न्हापांगु पृष्ठय् पिदंगु खः । जिं ठीक याना कि गलत याना ? जिं थौं नं धाये फयाच्वंगु मदु ।

डा. केशव मानजुं विज्ञान व प्रविधि मन्त्री जुयादीबले पासा राजां सुरेश व जित हरिहर भवनया मन्त्री क्वार्टरय् ब्वनायंकल । बहनी आठ बजेति थ्यंगु खः । कफी त्वनेगुया नापनापं खँ नं न्ह्यानाच्वन । सुरेशं मोबाइल न्ह्याय्पं न्ह्यःने यंका न्यनेगु शुरु यात अले गफगाफय् नं दुथ्याना हे च्वन । पौने नौ बजे बीबीसी समाचार प्रसारण न्यनादीगु खः धकाः जिं सिइका कया । मन्त्रिपरिषद् बैठकय् मन्त्रीतय् पाखें प्रस्तुत जुइगु प्रस्ताव गथे च्वनी धैगु समाचारय् ज्या याइपिंत सिइके बिइमाः धकाः मन्त्रीजु्ं जिमित सःतके ब्यूगु जुयाच्वन ।

कन्हय् कुन्हु बीबीसी प्रसारण याःगु समाचारया हे लिधंसा कया वय्कलं सन्ध्या टाइम्स न्हिपत्तिइ समाचार पिथना दिल । विषय चाहिं लुमं मजुल । टिपे मयासें समाचार तयार यायेगु वय्कःया बिस्कं शैलीया थ्व नं छगू नमूना खःला ?

सुरेश नाप उलि भ्यलय् पुना जुयाम्ह मखु जिं । अथे खःसां बहनी लिबाक्क ज्याकुथिइ ज्या सिधयेका पलाः च्वयेकिइपिं सन्ध्या टाइम्सया पुचः लिसेलिसे प्यक्वः न्याक्वति हे लिहां वयागु् लुमं । लगं दलाछिया राजाया छेँ वनाः त्यानु लंकः वनेगु । मःमः नं नयेगु । अन गबले गबलें सांसद कृष्णगोपाल नं दयाच्वनी । गुंगुं दिं सुरेशपिं लिबाना छेँ लिहाँ मवसें अन हे द्यना छ्वइ ।

छक्वः ताहाचःया सन्ध्या टाइम्सया ज्याकू लिक्क छथाय् मेचय् फेतुना सुरेश नाप दुबिस्ता ब्याकाःगु नं लुमसे वः । नेपालभाषाया पत्रिकाय् ज्या याःयाः त्यानु चाःगु व पत्रिका पिथनेत दुग्यंगु ग्वाहालि चूमलागु दुःख वय्कःया म्हुतुं न्यना । नैराश्यता त्वःपूगु वय्कःया मनोदशायात जिं ब्वनेगु कुतः याना । वय्कः छक्वः जिगु न्ह्यःने थुकथं हिइमिइ चायादीगु खः ।

यक्वः दँ लिपा राससपाखें नेपालभाषाया बुलेटिन पिकायेगु खँ क्वजित । थुगु अभियानय् शुरुनिंसे छलफलय् ब्वति कया वय्कलं ग्वाहालि यानादिल । प्यम्ह भाषा अनुवादकतय्त अन्तर्वार्ता कयादीपिं मध्ये वय्कः छम्ह खः । भाषा विशेषज्ञ कथं वय्कःयात ब्वनेगु धकाः रासस उच्च व्यवस्थापन क्वछ्युगु खः ।

राससपाखें नेपालभाषा व मैथिली भाषाया समाचार पिकायेगु योजना न्यनाः हनेबहःपिं भाषा अभियन्तातय् छपुचः रासस ज्याकुथि, सिंहदरबार थ्यंक झाल । थुगु पुचलय् सुरेश किरण नं दुथ्याः । वय्कःपिंसं थुगु ज्या न्ह्याकेत जनशक्ति माःगु खःसा उपलब्ध याना बिइफु धकाः राससया कार्यकारी अध्यक्ष न्ह्यःने बचं बियादीगु प्रसंग नं थुथाय् लाक्क लुमंसे वयाच्वन।

छुं ई न्ह्यःतिनि नेपालभाषा टाइम्स न्हिपौया निंतिं लेख रचना च्वयेत छपूच पासाःपिंत ज्याकुथिइ ब्वनाः वय्कलं सहलह ब्याकादीगु खः । थुकथं मां भाय्या निंतिं चाःन्हि समर्पित जुया यक्वः यक्वः यायेगु तातुना च्वंम्ह छम्ह कर्मवीर कलमजीवी खः सुरेश । वय्कःया असामयिक अवसान प्रति श्रद्धाञ्जलि देछाना ।