नेपाल कम्युनिष्ट पार्टी (एमाले)या महासचिव शङ्कर पोखरेलं कम्युनिष्ट आन्दोलनयात पुनःजागृत व पुर्नगठित यानाः न्ह्याःवनेगु धयादीगु दु। पार्टी केन्द्रीय ज्याकुथि, च्यासः यलय् सम्पर्क विशेष सङ्गठन कमिटीं थौं ग्वसाः ग्वःगु ज्याझ्वलय् वय्कलं जनताया बहुदलीय जनवादया माध्यमं थौंया हाथ्या सामाना यानाः न्ह्याःवनेगु धयादिल।

महासचिव पोखरेलं धयादिल, “आःया निराशायात सङ्कल्पय् हिलायंके व सङ्कल्पयात आशाय् हिलायंके। सत्ता व केन्द्रमुखी जुयाः जनता दथुइ वने मफूगुलिं कम्युनिष्ट आन्दोलन ल्यूने लाःगुलिं आःया न्यादँ प्रतिपक्षय् च्वनाः जनतालिसे स्वानाच्वने गु जुइ।” वय्कलं थुगुसी पार्टी बूसां नं आः देय्या बल्लाःगु व निर्णायक शक्तिकथं स्थापित यायेगु कथं ज्या यायेमाःगुलिइ बः बियादिल ।

“विसं २०६४ या संविधानसभाय् थुकथं हे बूगु खः। थुगुसी नं अजाःगु अवस्था वल, तर थुकिइ बुनाः निराश मजूसे शक्ति सञ्चय यानाः हाकनं वइगु चुनावय् थ्व अवस्था हिले”, महासचिव पोखरेलया धापू खः।

पार्टीया छ्याञ्जे पद्मा अर्यालं हाकनं जनतालिसे स्वानाः पार्टीयात च्वय् थकायेगु धयादिल। सम्पर्क विशेष सङ्गठन कमिटीया नायः अशोक ठकुरीं पार्टीयात हाकनं छधी यानाः यंकेत विशेष भूमिका म्हिते धयादिल।

Categorized in राजनीति