युरोपेली देय् पोर्चुगलय् च्वंपिं नेवाःतय्सं ऐतिहासिक लिसें सांस्कृतिक महत्वया नखः बिस्काः जात्रा न्यायेकेत्यंगु दु।

नेवाः समाज पोर्चुगलया ग्वसालय् थ्वहे १५ अप्रिल (आः वइगु वैशाख २ गते) या दिं राजधानी लिस्बनय् थन च्वंपिं नेवाःतय्सं झःझः धायेक बिस्काः जात्रा न्यायेकेगु धाःगु दु। नेवाः तजिलजि, भाषा, कला व धर्मसंस्कृतिया संरक्षण व प्रवद्र्धन यायेगु तातुना न्हूगु दँ २०८३ या भिंतुना कालबिल लिसें झःझः धायेक बिस्काः जात्रा न्यायेकेत्यनागु धकाः नेवाः समाजया नायः अमृतरत्न शाक्यं जानकारी बियादिल।

वय्कःया कथं ज्याझ्वलय् नेवाः धर्म–संस्कृति व परम्परा कथं भैरः द्यःया विशेष पुजा याइगु जूगु दु। नापनापं समयबजी, सिन्ह तिकेगु, ध्वाँय् ब्वज्या व सगं लिसें थःथवंय् भिंतुना कालबिलया ज्याझ्वः क्वःछिनातःगु दु । नेवाःकला व तजिलजिया माध्यमं पोर्चुगलय् दुपिं नेवाःत दथुइ थःथवंय् मंकाः ज्या, नापलायेगु ज्यायात अझं क्वातुकेगु निंतिं जात्रा ग्वसाः ग्वयागु धकाः वय्कलं धयादिल।

उगु ज्याझ्वलय् लाखे प्याखँ, धिमे बाजं, बाँसुरीया सलय् नेवाः कला व तजिलजि पिब्वइगु कथंया सांस्कृतिक ब्वज्यात न्ह्यब्वयेगु धयातःगु दु। लिस्बनया आरोइसय् च्वंगु ग्रिल एन्ड चिल रेस्टुरेन्टया हलय् जुइगु उगु ज्याझ्वलय् ब्वति कायेत नेवाः समाजं पोर्चुगलवासी नेवाःतय्त विशेष इनाप याःगु दु।

Categorized in राष्ट्रिय