टोखाय् बिस्काः जात्रा न्ह्याःगु दु। तःल्याखय् नेवाःत दूगु थनया सपनतीर्थया मेला नापं न्ह्याःगु दु।

जात्रा व्यवस्थापन समितिया ल्यूकजि गणेशमान श्रेष्ठया कथं म्हिगः देगलं गामय् खः हयेगु व गां चाःहिकाः सपनविनायकया खः यलागः त्वालय्, चण्डेश्वरीया खः थलागः त्वालय् व मसानकालीया ख्यः जुयाः भूतख्यलय् दिकूगु खः।

थौं सुथय् स्वंगूलिं खःयात गां चाः हिकाः मसानकालीया खः भूतख्यःया फल्चाय् दिकेधुंकाः बलि पुजा बियाः कोठु गणेश व मसानकाली निगूयां खः थलागः त्वालय् दिकूगु खः। थौं सनिलय् तलेजु पाखें सिन्दुरजात्रा याइ।

वैशाख ३ गते सुथय् तपलाक्षीः पाखें भुइसिन्ह जात्रा यानाः द्यः खः यात हासल त्वालय् दिकाः न्हिनय्  कुमारी द्यः लिसेंया भुइसिन्ह जात्रा यानाः सरस्वती व महाद्यःया खः बाहेकं मेमेगु खःयात पुखूलिइ यंकाः शुद्ध याइगु वय्कलं धयादिल। जात्राया लिपांगु दिं वैशाख ४ गते सुथय् बाजं थानाः भुइसिन्ह जात्रा यानाः गां चाःहिलेगु याइ । वैशाख ५ गते सुथय् यःसिं क्वःथले धुंकाः जात्रा क्वचाइ ।

टोखाय् थौं सार्वजनिक बिदा विस्काः जात्राया लसताय् टोखा नगरपालिकां थौं टोखा नगरपालिका जःछि सार्वजनिक बिदा ब्यूगु दु। वंगु चैत १५ गतेया टोखा कार्यपालिकाया बैठकं थौं नगरपालिका लागाय् सार्वजनिक बिदा बिइगु निर्णय याःगु खः।

Categorized in राष्ट्रिय