मदनकृष्णयात ‘ललितरत्न’ उपाधिं छायेप्यूसें नागरिक अभिनन्दन
लहना न्यूज | बछलाथ्व अक्षयदुतिया ११४६, बैसाख ७ आईतवाः
वरिष्ठ कलाकार ख्यालि जुजु मदनकृष्ण श्रेष्ठया बुदिंया लसताय् यल महानगरपालिका १६ वडा कलाकार समितिं ‘ललितरत्न’ उपाधि देछाःसें हंगु दु । अक्षयतृतीयाया दिनय् वय्कःया बुदिं हनाज्याझ्वः यासें थुगु हना देछाःगु खः । समितिया थुगु हनानापं, समाजसेवी सरीता महर्जन, शाक्य बज्राचार्य समाज, नेपालभाषा मंकाः खलः यल, मुनासः, वाद्य शिरोमणी घराना, ललितपुर सुनचाँदी ब्यवसायी संघ, स्यस्यः समाज, ज्योति म्यूजिक, ताम्राकार समाज, यल नेवाः समाज, लकस नेपाल, ललितपुर हस्तकला संघ, थ्रीस्टार क्लब, डिलाइट स्कुल, ललितपुर तयारी पोशाक ब्यापार संघ, मंगल टोल सुधार संघ, भुल्खु टोल सुधार समिति, प्रोजेक्ट बाजा नेपाल, प्लेइङ फर चेञ्ज, नेवाः पत्रकार राष्ट्रिय दबू यल कचा, नेपाः पासा पुचः गुथि अमेरिका यानाः २१ गू संघसंस्था हँसे नागरिक अभिनन्दन याःगु खः ।
थुगु ज्याझ्वलय् कलाकार श्रेष्ठयात धाःबाजा थानाः जात्रा यासें यल लायकुलिइ लसकुस याःगु खः । धाःबाजा, चर्या कलाकारपिं, नेपाःया थीथी जातजातिया प्रतिनिधित्व भेषभुषाय् मचापिं, वडा समिति, कलाकार समिति, नागरिक अभिनन्दन याइगु थीथी संस्था पुच व जनसमुदाय जानाः वयकःयात कात्तिदबुलिइ न्ह्यःने आशन ग्रहण याकाःलि धाःबाजा न्ह्यब्वःया हना ज्याझ्वः खः । ज्याझ्वलय् प्रसन्ना बज्राचार्य व प्रिजा शाक्यं आर्यतारा अमोघसिद्धी चचा प्याखं न्ह्यब्वयादीगु खः ।
ज्याझ्वलय् बूदिंया लसताय् बूदिया भितुना थ्वयेकूसें कलाकार समितिया दांभरि सलोना बज्राचार्य, दुजः रमा तुलाधर बज्राचार्यनापं तेजशोभा बज्राचार्यं खँय् सगं लःल्हानादीगु खःसा समितिया सचिव अमोघवीर बज्राचार्यं स्वस्ति वाचन यानादीगु खः ।
डिलाइट स्कुलया ब्वमिपिन्सं 'सयथरी बाजा एउटै ताल' म्येय् हुलाप्याखं न्ह्यब्वयादीगु, वाद्य शिरोमणी संगीत घरानाया वाद्यवादकपिन्सं थुगु हे म्येया भ्वाइलिन वादन यानादीगु थुगु ज्याझ्वलय् औपचारिक रुपं गुगु नं न्वचु मतःसे पुचः अन्तरवार्ता यानाः खँल्हाबला ब्याकूगु स्वकुमिपिन्सं अतिकं न्ह्याइपु तायेकूगु खः । खँल्हाबलानापं मदनकृष्ण श्रेष्ठजुं म्ये नं न्यकादीबलय् ज्याझ्वः अझ झःझः धाःगु खः । ज्याझ्वलय् मदनकृष्ण श्रेष्ठ, वडा नायः निर्मलरत्न शाक्य, श्रेष्ठया काय् भाजु यमन श्रेष्ठ, भौ रिंकु बज्राचार्य श्रेष्ठ व समाजसेवी सरीता महर्जननाप खँल्हाबला ब्याकूगु खःसा म्ये न्यंकादीबलय् भूपेन्द्र बज्राचार्यं गितार थानादीगु खःसा यमन श्रेष्ठं किबोर्ड थानादीगु खः । मदनकृष्ण श्रेष्ठं ‘अरबौं मान्छेहरुमा’ ‘फुलबुट्टे साडी’, ‘खोलावारी खोलापारी’, सरीता महर्जननापं ‘न्ह्यलय् छि हे ज्वलय् छि हे’ व निशा देसारनाप ‘मयजु छ दः गुलि यः गुलि यः’ म्ये न्यकादीगु खः ।
कलाकार समितिया संयोजक सुरजवीर बज्राचार्य व सुजाता शाक्य बज्राचार्यं न्ह्याकादीगु थुगु ज्याझ्वः न्ह्यः ख्यालि जुजु श्रेष्ठया बुदिंया लसताय् समिति सुथसिया १० बजेनिसें २ बजेतक रक्तदान ज्याझ्वः नं याःगु खः ।
स्थानीय तहय् दकले न्हापांगु खुसी कलाकार समिति नीस्वनाः कला थीथी कासाया माध्यमं न्हूपिं कलाकारपिं मालेगु, सक्रियपिं कलाकारपिन्त दबू व ज्याझ्वः बीगु व वरिष्ठपिन्त हना देछायेगु ज्या यानाः वयाच्वंगु जुल ।
