अमेरिकाया क्यालिफोर्निया राज्यया सानफ्रान्सिस्कोय् ‘नेपाल उत्सव’ ग्वसाः ग्वःगु दु। नेपाली कला, तजिलजि, वसः लिसें परम्पराया प्रदर्शनपाखें नेपाःयात अन्तरराष्ट्रिय ख्यलय् म्हसिकेगु तातुना नेपाल उत्सव ग्वसाः ग्वःगु खः।

गैरआवासीय नेपाली सङ्घ (एनआरएनए) क्यालिफोर्नियालिसेंया नेपाली सामाजिक संस्थाया मंकाः ग्वसालय् जूगु उत्सवय् अमेरिकाया थीथी सहरय् च्वनाच्वंपिं नेपाली समुदायया तःल्याखय् ब्वति दूगु खः। लस एन्जलस, सानडिएगो, साक्रामेन्टो, बेकर्सफिल्ड, लङबीच लिसें जःखःया राज्य व सहर पाखें नेपाःमित उत्सवय् ब्वति कायेत सान फ्रान्सिस्को थ्यंकूगु खः। सान फ्रान्सिस्को सिटी हलपाखें न्ह्याःगु नेपाल डे परेड एम्बार्काडेरो प्लाजातक थ्यंमथ्यं १.६ माइल तक सञ्चालन याःगु खः।

परेड जःछि सहरया मू लागा मार्केट स्ट्रिटय् सवारी आवागमन बन्द यानाः लँजुवातय्गु निंतिं चायेकूगु खः। थीथी जातीय लिसें क्षेत्रीय संस्थातय्सं न्ह्यब्वःगु झाँकी, नेपाली वसःलिसें सांस्कृतिक ज्याझ्वः न सान फ्रान्सिस्कोया सतकयात ‘नेपालमय’ दयेकूगु खः। ज्याझ्वलय् ब्वज्यायाःगु नेपाली कला व तजिलजियात स्थानीय अमेरिकाया समुदायं नापं न्ह्यइपु तायेकाः अवलोकन याःगु खः।

नेपाली समुदाययात हःपाः बिइत अमेरिकाया थीथी स्थानीय जनप्रतिनिधिपिंसं नापं ज्याझ्वलय् ब्वति काःगु खः। ज्याझ्वःया आकर्षण पञ्चकन्या, पञ्चेबाजा, शङ्खध्वनि, कुमारी, धिमे लिसें लाखे प्याखँ जूगु खः।

उत्सवय् सान फ्रान्सिस्कोय् च्वंगु थीथी देय्या महावाणिज्य दूतावासया कूटनीतिक अधिकारी, बे एरियाया मेयर लिसें सिटी काउन्सिल दुजःपिनिगु नापं ब्वति दूगु एनआरएनए क्यालिफोर्नियाया छ्याञ्जे कैलाश केसीं जानकारी बियादिगु दु।

Categorized in राष्ट्रिय