२०२३ सालंनिसें नेपाःया ख्वाःपाः प्याखं लिसें संस्कृतिया अनुसन्धान यानादीम्ह नृत्यकलाविद वीणा जोशी (राजभण्डारी) या कृति न “नेवार समुदायको परम्परागत मकुन्डोनाच” नाच सफू विमोचन जुल ।

वंगु आइतवाः यल नेवाः समाजया ग्वसालय् जूगु ज्याझ्वलय् च्वमिया सछि दँ दुम्ह मां गंगादेवी राजभण्डारी लिसे स्वनिगःया थीथी जातिया परम्परागत नृत्यकलाया लिसे झिंन्याम्ह नेवाः गुरुपिंपाखे मंकाः कथं विमोचन यायेगु ज्या जूगु खः ।

न्यत भुलु अजिमाया मूगुरु देवकृष्ण महर्जन, किलागःया द्यःप्याखँया मूगुरु ब्रम्हु महर्जन, सिकाली प्याखंया मूगुरु महन्तलाल डंगोल, जल प्याखंया मूगुरु धनबहादुर महर्जन, यल कात्ति प्याखंया गुरुप्रतापधर शर्मा, संस्कृत शिरोमणि हरिराम जोशी, चर्या संगीतविद् यज्ञमानपति वज्राचार्य, यलया चर्या प्याखँ गुरु पदमराज वज्राचार्य, हेमबज्र वज्राचार्य, आधुनिक रङ्गमञ्च नाचया गुरु रमा मास्के राजवाहक, दाप्चा तल्लो हदियाया प्याखँगुरु रामेश्वर श्रेष्ठपिसं सफू विमोचन यानादीगु खः ।

नेवाः समुदायया लोपोन्मुख मुहाली बाजा पुयाः न्ह्याःगु ज्याझ्वलय् नृत्यकलाया गुरुपिंत महत्व बिसें च्वमि थम्हं गुरु वन्दना प्याखँ न्ह्यब्वयादीगु खः ।ज्याझ्वलय् सम्बोधन यासें च्वमि जोशीं थम्हं देय्न्यंकंया जातजातिया अनुसन्धान यायेगु योजना दयेकूगु खःसा नं सम्भव मदुगुलिइ थम्हं नेवाः समुदायया ख्वाःपाः प्याखँया बारे अध्ययन केन्द्रित यानागु खँ धयादिल ।

८२ दँ दुम्ह च्वमि जोशीया लगनशीलता, नृत्यकला लिसे थ्व विषयया ऐतिहासिक व व्यवहारिक सामाजिक पक्षया अनुसन्धानात्मक सक्रियताया चर्चा यासें संस्कृति शिरोमणि हरिराम जोशी व नृत्यकला लिसे चर्यानृत्यविद् यज्ञमानपति वज्राचार्य, प्रा.डा. ध्रुवेशचन्द्र रेग्मीं सफु संग्रहयोग्य जूगु धासें सफूया समीक्षा यानादीगु खः ।

Categorized in राष्ट्रिय