नवनियुक्त प्रधानन्यायाधीश डा मनोजकुमार शर्मां पदबहाली यानादीगु दु। राष्ट्रपति रामचन्द्र पौडललं पद लिसें गोपनीयताया शपथ ग्रहण याके धुंकाः वय्कलं म्हिगः हे सर्वोच्च अदालतय् वनाः पदबहाली यानादीगु खः।

नेपाःया संविधानया धारा, १२९ या उपधारा, २ कथं संवैधानिक परिषद्या सिफारिसय् राष्ट्रपति पौडेलं म्हिगः हे डा शर्मायात प्रधानन्यायाधीश पदय् नियुक्त यानादीगु खः। उकिया न्ह्यः सिंहदरबारय् च्वंगु संसदीय सुनुवाइ समितिया बैठकं प्रधानन्यायाधीश पदय् वय्कःयात सर्वसम्मतिं अनुमोदन याःगु खः।

संवैधानिक परिषदया सिफारिसय् संसदीय सुनुवाइ समितिं अनुमोदन याये धुंकाः राष्ट्रपतिं प्रधानन्यायाधीशय् नियुक्ति यायेगु संवैधानिक व्यवस्था दयाच्वंगु दुविसं २०२७ असार ४ गते पर्साया वीरगञ्जय् जन्म जुयादीम्ह नवनियुक्त प्रधानन्यायाधीश डा शर्मा २०७६ वैशाख ६ सर्वोच्च अदालतया न्यायाधीश जुयादीगु खः।

नेपाल ल क्याम्पसपाखें बीएल व भारतया पुणे विश्व विद्यालयपाखें एलएलएम यानादीम्ह वय्कलं त्रिभुवन विश्व विद्यालयपाखें श्रम कानुनय् विद्यावारिधि यानादीगु खः। न्यायया ख्यलय् कानुन व्यवसायीपाखें दुहां झायादीम्ह डा शर्मां २०७० साल जेठ २७ निसें २०७२ मङ्सिर २६ गतेतक उच्च अदालतया अतिरिक्त न्यायाधीश जुयाः ज्या यानादीगु खः। प्रधानन्यायाधीश डा शर्माया कार्यकाल २०८९ असार ४ तकया जुइगु दु।

Categorized in राष्ट्रिय