ओलम्पस क्लबया न्यय्च्याक्वःगु बुदिं क्षेत्रपाटी पार्टी प्यालेसय् वंगु शुक्रवाः तःजिक हंगु दु। न्हापांगु चरणय् प्रमिला मानन्धरं न्ह्याकूगु बुदिँ हनेगु ज्याझ्वलय् उगु क्लबया जः व दुजः मुनेगु व हनेगु ज्याझ्वःनं जूगु खः।

क्लब निस्वंगु इलंनिसें थौंतक थीथी कथं ग्वाहालि यानावया च्वंपिं स्वास्थ्यकर्मी, क्लबया क्लिनिकया ल्याब टेक्निसियन, समाजसेवी, बुद्धिजिवि, थीथी दँया हिदान ज्याझ्वःया संयोजकपिं, सञ्चारकर्मी, थीथी मिडिया, स्वास्थ्य स्वयम् सेविकापिंत क्लबया अध्यक्ष पबित्र बज्राचार्य, वडा अध्यक्ष मचाराजा महर्जन व न्वकू ज्योति शाक्यपिसं लुमन्ति चिं लःल्हानादीगु खः।न्हापां ज्यासना पुचःया पदाधिकारीपिं म्हसीकेगु ज्या न्ह्याःगु ज्याझ्वलय् नायः बज्राचार्य क्लबया म्हसिका नापं थौंतक्क यानावःगु गतिबिधिया बारे दुग्यंक खँ कना लसकुस न्वचू तयादीगु खः।

नुगः खँ तयेगु झ्वलय् नायः बज्राचार्यं ओमबहाः त्वालय् थीथी कथंया व्यक्तित्वपिं बूगु त्वाः गथेकि गद्यगुरु निष्ठानन्द, सिद्धिचरण श्रेष्ठ, पुस्तकालय, थीथी भाषिक, सामाजिक, दबू प्याखँ व प्याखँम्वत ब्वलंगु थाय् ओमबहाःत्वा छगू नमूना त्वाः जूगु खँ लुमंकादीगु दु। ज्याझ्वः न्वकू ज्योति शाक्यं न्ह्याकादीगु खः। अथेहे वरिष्ठ म्ये हालामि प्रवेशमान शाक्यं लोकंह्वाःगु म्ये न्यंकाः ज्याझ्वःयात अझ झःझः धायेका ब्यूगु दु।

Categorized in राष्ट्रिय