प्रतिनिधिसभाया थौंया बैठकय् प्रतिपक्षी दलतय्सं मद्दिक विरोध याःगुलिं बैठक सोमबाः तक स्थगित जूगु दु। क्वःछिनातःगु ई स्वयां स्वघौ लिबाक्क सुरु जूगु बैठकय् प्रमुख प्रतिपक्षी व विपक्षी दलं राष्ट्रियता, सार्वभौमसत्ता व अखण्डताया विषय छुं नं सम्झौता जुइमफइगु न्ह्यथसें प्रधानमन्त्रीं थःगु धारणा लित कायेमाःगु धारणा तःगु खः।

सभामुख डोलप्रसाद अर्यालं विपक्षी दलतय्त कार्यसूचीइ प्रवेश यानाः ग्वाहालि यायेत तःक्वःमछि इनाप यानादिल। बजेटलिसें महत्वपूर्ण विषयय् सहलह यायेमाःगु जूगुलिं आसनग्रहण यानाः बैठक सञ्चालनय् ग्वाहालि यायेत वय्कलं इनाप यानादिल। विपक्षी दलया सांसदतय्सं सभामुखया इनापयात अस्वीकार यानाः मद्दिक विरोध यानाच्वंगुलिं बैठक थ्व हे जेठ २५ गते सोमबाः सुथसिया ११ ताः इलय् च्वनेगु कथं स्थगित जूगु खः।

थौंया बैठकय् सभामुख अर्यालं राष्ट्रपति ज्याकुथिं वःगु विधेयक प्रमाणीकरणसम्बन्धी पत्र ब्वनाः न्यंकादिल। व स्वयां न्ह्यः नेपाली कांग्रेसया सांसद अभिषेकप्रसाद साहं नेपाल–भारत सीमाया सम्बन्धय् प्रधानमन्त्री वालेन्द्र शाहं सदनय् तयादीगु धारणा पुष्टि यायेत इनाप यानादिल। वय्कलं नेपाली कांग्रेसपाखें उगु सम्बन्धय् सदनय् विरोध दर्ता याःगु जानकारी बियादिल। श्रम संस्कृति पार्टीया सांसद हर्कराज राईं देय्या सार्वभौमसत्ता, अखण्डता बचे यायेगु सम्बन्धय् फुक्क सांसदतय्गु समान धारणा जूगु न्ह्यथनादिल। राष्ट्रिय प्रजातन्त्र पार्टीया सांसद खुश्बु ओलीं प्रधानमन्त्री व्यक्ति मखुसे संस्था जूगुलिं अजाःगु निकायपाखें गलत धारणा वःगु थःथवय् ग्राह्य मजूगु तर्क तयादिल।

देय्या सीमा, सार्वभौमसत्ता, अखण्डताया विषयय् सम्झौता जुइमफमखु धइगु वय्कःया धापू खः। नेपाली कम्युनिष्ट पार्टीया सांसद युवराज दुलालं प्रधानमन्त्री देय्या अभिभावक जूगुलिं सीमाया सम्बन्धय् बियादीगु वक्तव्य तथ्यय् आधारित जुइमाःगुलिइ बः बियादिल। थःपिं संसद् अःपुक न्ह्यायेमा धइगुलिइ प्रष्ट जूगु न्ह्यथनादिसें वय्कलं उगु सम्बन्धय् सत्तापक्षया धारणा सार्वजनिक यायेत माग यानादिल।

नेपाल कम्युनिष्ट पार्टी (एमाले) या सांसद गणेशसिंह ठगुन्नां सीमा विवाद व अतिक्रमण विषय बिस्कं बिस्कं विषय जूगु धयादिल। देय्या भौगोलिक अखण्डता व सार्वभौमसत्ताया विषय सुं नापं नं सम्झौता जुइफइ मखु धइगु वय्कःया धापू खः।थौंया बैठकय् अर्थमन्त्री डा स्वर्णिम वाग्लें ‘आर्थिक दँ २०८३÷८४ या राजस्व व व्ययया वार्षिक अनुमानय् सामान्य सहलह प्रारम्भ यायेमा’ धइगु प्रस्ताव प्रस्तुत याइगु कार्यसूची दूगु खः।

थथेहे सदनय् आर्थिक दँ २०८३÷८४ या राजस्व व व्ययया वार्षिक अनुमानय् सामान्य सहलह प्रारम्भ यायेगु कार्यसूची दूगु खः।

Categorized in राष्ट्रिय