किड्नी ल्वचं कया वासः याका च्वनादीम्ह नेपालभाषाया न्हापांम्ह सिने पत्रकार, संकिपा निर्देशक, भाषासेवी साहित्यकार विजयरत्न असंबरे हना ज्याझ्वःलिसें वयकःयात थीथी कथं ग्वाहालि यानादीपिन्त सुभाय देछाः ज्याझ्वः शनिबार क्वचाःगु दु।

विजयरत्न असंबरे ग्वाहालि पुचःया ग्वसालय् जूगु उगु ज्याझ्वः पवित्र बज्राचार्य या सभाध्यक्षताय् जूगु खः। ज्याझवलय् नेवाः न्ह्यलुवाः नेपालभाषा एकेडेमीया चान्सलर मल्ल के सुन्दर मूपाहाँ कथं झायादीगु खः। वयक थ्व पुचःया संरक्षक नं खः।

गायक व सन्चारकःमि सुरजबीर बज्राचार्यं न्ह्याकादीगु उगु ज्याझ्वलय् मेम्ह गायक लिसे भाषासेवी पवित्र कसाः न असंबरेया म्हसिका ब्वना न्यंकादिलसा यल वडा १६ कलाकार समितिया दुजः रमा तुलाधरं हनापौ ब्वना न्यंकादिल। मूपाहाँ मल्लं थ्व पुचःया मू आज्जु व असंबरे यात मालिबले माःकथं ग्वाहालि यायेगु खँ कनादिल।

अथेहेतुं असंबरें थः थ्व क्षेत्रय् लगेजुया थकथं ग्वाहलि व सदभावना कमेयाये फुगु खँ कनादिल। ज्याझ्वलय् विजयरत्न असंबरेयात हना देछायेगु झ्वलय् यल वडा १६ या वडा अध्यक्ष्य निर्मलरत्न शाक्यं दोसल्ला न्येका दिलसा नेवाः जागरण मन्चया कजि सुजिब बज्राचार्यं स्वाँ देछानादिल।मूपाहाँ मल्लं हनापौ व पबित्र बज्राचार्यं दां लःल्हानादिल।

Categorized in राष्ट्रिय