येँ महानगरपालिकां वा वयाः न्हापाया दँतय्के थें स्वनिगलय् थुगुसी फोहर व्यवस्थापनय् समस्या जुइमखु धाःगु दु। न्हापा वा वइगु सुरु जुइ धुंकाः फोहोर व्यवस्थापनय् समस्या जुइगु जुयाच्वंगु खः।

न्हापा समस्या जूगु फुक्क धइथें थासय् सतक मर्मत जुइधुंकूगु व ल्यंदूगु छुंछुं थासय् नं ज्या जुयाच्वंगुलिं न्हापाया दँतय्के थें समस्या जुइमखु धकाः येँमपा वातावरण विभागया प्रमुख सरिता राईं जानकारी बियादिल।प्रमुख राईया कथं फोहोर व्यवस्थापनस्थल बञ्चरेडाँडातक वनेगु लँसम्बन्धी हाथ्या मदयेधुंकूगुलिं वइगु इलय् समस्या जुइमखु धयादिल। वय्कलं धयादिल, “सिसडोलय् थुगुसी फोहोर व्यवस्थापनय् समस्या जुइमखु।”

राईया कथं तीनपिप्लेनिसें सिसडोलतक पःखाः निर्माण यानातःगुलिं मद्दिक वा वःसां नं समस्या जुइमखु। विसं २०६८ य् सरकारं जारी याःगु फोहोरमैला व्यवस्थापन ऐन व २०७७ सालय् येँमपां जारी याःगु वातावरण लिसें प्राकृतिक स्रोत संरक्षण ऐनकथं सहरी सुचुकुचु व स्वच्छताया निंतिं फोहोर स्रोतय् हे छुटे यायेगु दायित्व उत्पादकया जुइगु कानुनी व्यवस्था दूगुलिं आः उगु हे व्यवस्थाकथं न्ह्याःवनेगु नं येँमपाया तयारी दु।

बञ्चरेडाँडाय् यंकीगु फोहोरया मात्रा म्ह्वः व वैज्ञानिक व्यवस्थापन यायेत येँमपां ३२ गू वडायात न्हय्गू थासय् ब्वथलाः व्यवस्थापन यानातःगु खः । प्रविधि छ्यलाः फोहोरमैलाया पाय्छिगु व्यवस्थापन यायेगु येँमपाया कार्यवाहक प्रमुख सुनिता डङ्गोलं सार्वजनिक यानादीगु नीतिइ धयातःगु खः।येँमपाया वइगु आर्थिक दँया नीति व ज्याझ्वः नं फोहोरमैला व्यवस्थापनया खँयात विशेष प्राथमिकताय् तयातःगु खः।

थुकिया निंतिं येँमपां फोहरमैला व्यवस्थापन सेवा शुल्कयात प्रदूषकं पुलेगु सिद्धान्तकथं एकद्वार प्रणालीपाखें सङ्कलन यायेगु व्यवस्था दयेकीगु जूगु खः।स्वनिगःया अन्तिम फोहर व्यवस्थापनया थाय् बन्चरेडाँडा ल्यान्डफिल साइटय् मेकानाइज्ड मेटरियल रिकभरी फ्यासिलिटी सञ्चालन यानाः फोहोरया वैज्ञानिक व्यवस्थापन यायेगु नीति व ज्याझ्वलय् स्पष्ट न्ह्यथनातःगु खः।

‘स्थानान्तरण केन्द्रं पिहाँवःगु न्यून फोहोरयात बन्चरेडाँडा ल्यान्डफिल साइटय् मेकानाइज्ड मेटरियल रिकभरी फ्यासिलिटी सञ्चालन यानाः फोहोरया वैज्ञानिक व्यवस्थापन यायेगु येँमपाया तयारी दु।बन्चरेडाँडा ल्यान्डफिल साइटय् फोहोरमैला विसर्जन यायेगु फुक्क स्थानीय तहं फोहोर परिमाण व प्रकृतिया आधारय् वित्तीय साझेदारी यायेत कुतः यायेगु नीतिपाखें स्पष्ट रुपं घोषणा यायेधुंकूगु खः।

Categorized in राष्ट्रिय