स्विट्जरल्यान्डं क्यानडायात बुकाः फिफा विश्वकप–२०२६ या ‘नकआउट’ चरणय् दुहांवंगु दु। क्यानडाया भ्यानकुभरय् च्वंगु बिसी प्लेस स्टेडियमय् थौं जूगु धेंधेंबल्लाय् घरेलु पुचः क्यानडायात २–१ गोल अन्तरं बुकाः स्विट्जरल्यान्ड समूह ‘बी’या समूह विजेता जुुसें नकआउट चरणय् थ्यंकूगु खः। स्विट्जरल्यान्ड त्याःगु कासाय् रुबेन वर्गासं न्हापांगु गोल यात।

वय्कलं कासाया ४६ मिनेटय् गोल यानाः पुचःयात न्ह्यने यंकल। कासाया ५७ गूगु मिनेटय् जोहान मान्जाम्बीं गोल यानाः स्विट्जरल्यान्डयात निदुगलं न्ह्यने लाकल। उकिया लिपा कासाया ७६ गूगु मिनेटय् क्यानडाया प्रमिस डेभिडं छगू गोल यानाः धेंधेंबल्लाय् लिहांवयेगु कुतः यात। अथे खःसां उकिया लिपाय् काय् छुं गोल जुइ मफुत व स्विट्जरल्यान्डं क्यानडायात २–१ गोलं बुकल।

स्विट्जरल्यान्डं स्वंगू कासापाखें न्हय्गू ल्याः स्वाःगु दु। थौंया कासाय् बूगु क्यानडा नापं समूह ‘बी’या निगूगु धलखय् लानाः नकआउट चरणय् थ्यंकूगु दु। क्यानडाया ल्याः प्यंगू द। अथे हे थुगु समूहय् लाःगु बोस्निया एन्ड हर्जगोभिनाया नापं ज्वलंज्वः प्यंगू ल्याः दूगु जूगु खःसां गोलअन्तरया हुनिं लिउने लात। थौं हे जूगु मेगु धेंधेंबल्लाय् बोस्निया एण्ड हर्जगोभिनां कतारयात बुकूगु ख।

ल्याः धलखय् स्वंगूगु थासय् लाःगु बोस्निया एन्ड हर्जगोभिनाया नापं स्वंगूगु पुचःया कथं नकआउटय् वनेगु ह्वःताः धाःसा ल्यनाच्वंगु दनि। बोस्निया एण्ड हर्जगोभिनां कतारयात ३–१ गोल अन्तरं बुकूगु खः। छगू ल्याः जक ज्वनाः कतार धाःसा विश्वकप धेंधेंबल्लां पिहांवंगु द। 

Categorized in कासा