काठमाडौँ उपत्यका अपराध अनुसन्धान ज्याकुथिया पुचलं अवैध नेपाली ध्यबा, अमेरिकी डलर, लुँ व वहः लिसें छम्ह भारतीय नागरिकयात ज्वंगु दु।

ज्वंम्ह भारतया साङ्गली जिल्ला महाराष्ट्र तासगाव तालुका झारखण्ड छेँ जुयाः थौं कन्हय् येँ महानगरपालिका–२५ थँहिटी ज्याथा च्वनिम्ह ३३ दँ दुम्ह अमितइरगोन्डा घाली जूगु काठमाडौँ उपत्यका अपराध अनुसन्धान ज्याकुथिया प्रवक्ता लिसें प्रहरी उपरीक्षक रामेश्वर कार्कीं जानकारी बियादिल।

वय्कलं धयादिल, “येँया ज्याथा थँहिटी लागाय् छुं मनूतय्सं अवैध विदेशी विनिमय अमेरिकी डलर व राजस्व छले यानाः लुँ वहः ल्हयेगु, भण्डारण लिसें मिइगु यानाच्वन धइगु गोप्य सुचंया लिधंसाय् जिमिगु पुचलं घालीयात ज्वनागु खः।”घालीया पाखें नेपाली ध्यबा न्हय्गू लख स्विद्वः तका, अमेरिकी डलर ३४ द्वः व न्यासः, लुँ थें खनेदूगु म्हासुगु धातुया थीथी कुचात १७ कु (७५ ग्राम) लिसें वहः थें खनेदूगु धातु थीथी कथंया कुचात निगू किलो खुसः ग्राम ज्वनागु धकाः प्रहरीं धाःगु दु।

ज्वनातःम्ह घालीयात थप अनुसन्धान लिसें माःगु कारबाहीया निंतिं राजस्व अनुसन्धान विभाग, हरिहरभवन, यलय् छ्वयागु प्रवक्ता कार्कीं धयादिल।

Categorized in अपराध