फिफा विश्वकप–२०२६ फुटबल धेंधेंबल्ला अन्तर्गत ’राउण्ड अफ ३२’या कासाय् ब्राजिलं जापानयात बुकूगु दु।

अमेरिकाया ह्युस्टन कासा ख्यलय् थौं जूगु कासाय् ब्राजिलं जापानयात २–१ गोलअन्तरं बुकाः विश्वकपया लिपांगु १६ गूगु पुचलय् थ्यंकूगु खः। न्याक्वः तकया विश्वकप विजेता ब्राजिल न्हापांगु हाफय् छगू गोलं लिउने लानाच्वंगु स्थितिपाखें लिहांवसें कासा त्याकूगु खः।

जापानया काइसु सानों कासाया २९ गूगु मिनेटय् गोल यानाः पुचःयात न्ह्यने लाकूगु खः। उकिया लिपा कासाया ५६ गूगु मिनेटय् ब्राजिलया कासेमिरों हेडं गोल यानाः धेंधेंबल्लायात १–१ गोलया बराबरीइ थ्यंकल।

धेंधेंबल्लाया निगूगु हाफया इन्जुरी इलय् गाब्रीएल माटीनेलीं निर्णायक गोल याये धुंकाः जापानयात २–१ गोलं बुकुसें ब्राजिल विश्वकपया ‘राउण्ड अफ १६’ य् थ्यनेत ताःलाःगु खः।

Categorized in कासा