नेपाल आयल निगमं पेट्रोलियम पदार्थया भाः क्वकाःगु दु। निगम सञ्चालक समितिया  मङ्गलबाःया बैठकं पेट्रोल, डिजेल, मचिकं, हवाई इन्धन व एलपी ग्यासया भाः क्वकाःगु खः।

निगमं पेट्रोलया भावय् लिटरय् २० तका, डिजेल व मचिकंनय् ३० तकां भाः क्वकाःगु दु। अथे हे, हवाई इन्धन (आन्तरिकपाखे) लिटरय् ४० तका व हवाई इन्धन (अन्तरराष्ट्रियपाखे) येँया निंतिं प्रतिकिलोलिटर अमेरिकी डलर २६५ क्वकाःगु दु। एलपी ग्यासया भाः प्रतिसिलिन्डर सच्छि तकां क्वकाःगु दु।

न्हूगु मू धलः कथं स्वंगूगु वर्गअन्तर्गत येँ, पोखरा व दिपायलय् आः पेट्रोलया भाः लिटरया १९७ तका व डिजेल लिसें मचिकंया भाः लिटरया १९५ तका कायम जूगु दु। थ्वसिबें न्ह्यः थुगु क्षेत्रय् पेट्रोल लिटरया २१७ तका व डिजेल लिटरया २२५ तका जुया च्वंगु खः। अथे हे, न्हापांगु वर्गअन्तर्गत चारआली, विराटनगर, जनकपुर, अमलेखगन्ज, भलवारी, नेपालगन्ज, धनगढी व वीरगन्जय् पेट्रोल लिटरया १९४.५० तका व डिजेल लिटरया १९२.५० तका कायम याःगु दु। स्वंगूगु वर्गअन्तर्गत सुर्खेत व दाङय् पेट्रोलया भाः लिटरया १९६ तका व डिजेलया भाः लिटरया १९४ तका क्वःछ्यूगु दु। हवाई इन्धन (आन्तरिक) या न्हूगु भाः लिटरया २२९ तका कायम जूगु दु।

अथेहे, अन्तरराष्ट्रिय हवाई इन्धनया भाः येँया निंतिं अमेरिकी डलर १,५६६, पोखराया निंतिं झिंछसः व भैरहवाया निंतिं द्वःछि व ८५ प्रतिकिलोलिटर कायम याःगु दु। भाः क्वकाये धुंकाः उपभोक्तां एलपी ग्यास सिलिन्डरया (१४.२ किलोग्राम) आः निद्वः व खुइतकाय् काये खनीगु जूगु दु। थ्वसिबें न्ह्यः ग्यासया भाः सिलिन्डरया निद्वः व १६० तका जुया च्वंगु खः।

अन्तरराष्ट्रिय बजारय् पेट्रोलियम पदार्थया भाः थत क्वत जुया च्वंगु व इन्डियन आयल कर्पोरेसन (आइओसी) पाखें वःगु न्हूगु खरिद मूल्य कथं स्वचालित मूल्य प्रणाली कथं भाः समायोजन यानागु धकाः निगमं धाःगु दु।

Categorized in राष्ट्रिय