च्वंगु आर्थिक दँय् येँ महानगरपालिकाय् विपदया घटना म्ह्वः जक जूगु दु। वंगु आर्थिक दँय् येँ महानगरय् मुक्कं ४२५ गू थी थी शीर्षकय् विपदया घटना जूगु खः धाःसा न्ह्यानाच्वंगु आर्थिक दँया जेठतक ३४७ गू जक विपदया घटना जूगु येँमपा विपद् व्यवस्थापन विभागया प्रमुख अनिरुद्र नेपालं जानकारी बियादिल।

प्रमुख नेपालया कथं येँमपाय् जुइगु विपदया घटनामध्ये दकसिबे अप्वः मिं नइगु घटना जुइगु व लिपांगु इलय् येँमपां सम्बन्ध दूगु निकायलिसेया सहकार्यय् न्हियान्हिथं तार व्यवस्थापनया ज्या याःगुलिं मिं नइगु विपद्या घटना पाः जूगु खः। वय्कःया कथं मिं नइगु घटना यक्व जुइगु जुयाच्वंगु खः। ग्यास लिक जुयाः मिं नइगु व विद्युत् पोलय् यक्व तारत अव्यवस्थित रूपं तइगुलिं मिँ नइगु घटना अप्वः जुयाच्वंगु खः।

थुजाःगु घटना न्यूनीकरण यायेत सरोकार दूगु निकायलिसे सहलह लिसें समन्वय न्ह्याके धुंकूगु धाःगु खः। अथेहे, म्याद फूगु ग्यास सिलिन्डरया छ्यलाबुला, ग्यास पाइप व रेगुलेटर मद्दिक परीक्षण मयाइगुलिं मिं नइगु विपदया घटना अप्वयावनाच्व्ंगु महानगरया लिच्वः ख। त्वाःत्वालय् जनचेतना, न्हापा छगू थासं जक दमकल सेवा बिया वयाच्वंगुलिइ आः स्वथासं सेवा प्रवाह यायेगु ज्या न्ह्याकेधुंकूगुलिं वइगु इलय् थुजाःगु घटना म्ह्वः जुयावनीगु येँमपाया विश्वास खः।येँमपां आः ३२ गू हे वडाय् प्यगू पुचःयात परिचालन यानाः केवल प्रदायक संस्था व येँमपा प्रहरीया सहकार्यय् तार व्यवस्थापनया ज्या तःगतिं यानाच्वंगु खः। तार व्यवस्थापन यानातःथाय् सतक पोलय् तार ल्वानाः मिं नइगु घटना पाः जूगु खः।

“डुबानय् लाःपिं नागरिकतय्गु उद्धार यायेत प्यगः डुङ्गा तयारी अवस्थाय् तयातःगु दु”, विपद् पूर्वतयारीया विषय खँ ल्हानादिसें नेपालं धयादिल, “डुबानय् लाःपिंत उद्धार गथे यानाः यायेगु धकाः कृत्रिम अभ्यास, उद्धारया हे निंतिं आवश्यक जुइगु मेसिनरी सामान व उद्धारलिपा आवश्यक जुइगु त्रिपाललिसें सामग्री तयारी अवस्थाय् तयातःगु दु।” मनसुनजन्य विपद् व्यवस्थापन व पूर्वतयारीयात प्रभावकारी यायेत सुरक्षा निकाय लिसें थी थी सरोकारवाला सङ्घसंस्थातय्गु सहकार्यय् क्षमता अभिवृद्धि तालिम नापं कृत्रिम अभ्यास ज्याझ्वः पूवंकेधुंकूगु वय्कलं जानकारी बियादिल ।

लिपांगु इलय् येँय् अप्वयावनाच्वंगु सहरीकरण, ढलान प्रक्रिया, सरोकारवाला निकायलिसे सहलह मयाःसे हे सतक म्हुइगु व ल्हाकीगु ज्यां यानाः खुसिपाखें वइगु विपद्या घटना यक्व जुइगु जुयाच्वंगु खः।

Categorized in राष्ट्रिय