भारत सरकारया अनुदान ग्वाहालिं कार्यान्वयन याःगु यलया ज्येष्ठ वर्ण महाविहारयात सन् २०२५ या युनेस्को एसिया–प्रशान्त सांस्कृतिक सम्पदा संरक्षण पुरस्कारअन्तर्गत ‘अवार्ड अफ मेरिट’ लःल्हाःगु दु।

संयुक्त राष्ट्रसङ्घीय शैक्षिक, वैज्ञानिक लिसें सांस्कृतिक सङ्गठन (युनेस्को) एसिया–प्रशान्त सांस्कृतिक सम्पदा संरक्षण पुरस्कार अन्तर्गत महाविहारयात अवार्ड लःल्हाःगु खः। नेपाःया निंतिं युनेस्कोया प्रतिनिधि याको दु तोइं यल महानगरपालिकाया प्रमुख चिरीबाबु महर्जन व येँय् च्वंगु भारतीय राजदूतावासया नियोग उपप्रमुख डा राकेश पाण्डेया उपस्थितिइ धातुपट्टिका व आधिकारिक दसिपौ महाविहार उपभोक्ता समितियात लःल्हानादिल।

महाविहारया संरक्षण यायेगु ज्या नेपाःया सांस्कृतिक सम्पदा लागाय् भारत सरकारया भुखाय् लिपाया पुनर्निर्माण अनुदानया छब्व कथं नेरु १३.७८ क्वति लागतय् न्ह्याकूगु खः। प्रमुख महर्जनं सांस्कृतिक सम्पदा स्थल तय्गु पुनस्र्थापना यायेत आर्थिक ग्वाहालि उपलब्ध याकूगुलिं भारत सरकारप्रति आभार प्वंकादिल।

Categorized in राष्ट्रिय